Difor «dansar» dei seg ned i fart: – Som i Formel 1

Med hoftebevegelsar på høgde med dei beste i Skal vi danse bremsar han ned.

Nærast som ein god samba i 2/4-takt.

Men Johannes Høsflot Klæbo trenar nok ikkje til ei framtidig karriere i selskapsdans.

Han bremsar på ski.

– Det er ikkje tilfeldig, nei, seier han i det NRK vil prate med han om bevegelsane vi har sett.

Filmen i toppen av artikkelen er frå da Klæbo gjekk først over streken i semifinalen på sprinten under sesongopninga på Beitostølen fredag. Ein sprint han seinare vann overlegent.

Erik Valnes vart nummer tre i same skirenn.

Han likar også å nytte seg av «danseteknikken». Sjølv kallar han det for «rulleskibremsing», og viser til teknikken skiløparar brukar når dei skal bremse ned farten når dei går på rulleski.

– Det er ganske innarbeidd hos mange skiløparar. Det er faktisk ein ganske viktig detalj, seier Valnes til NRK.

– Det er ein kunst

Vanlegvis ville nok dei fleste av oss lagt på noko som liknar på ein sladd i staden for å danse oss ned i fart.

Men ein «breisladd» i målområdet ville ha øydelagd for Klæbo og Valnes. Eller meir rett vil det nok vere å seie at det ville ha øydelagd for smørjarane til skiløparane.

For det er dette det handlar om: skismurning.

– Eg sparar berre smurning. Eg gjer jobben hans (skismørjaren) litt lettare, seier Klæbo.

Valnes stemmer i:

– Det er slike ting som vi tenkjer på i sprint, altså å ikkje køyre på snø som slit smurning. Det er litt som i Formel-1 og det å slite dekk, eigentleg. Det er ein kunst.

NRKs langrennsekspert Pål Golberg er klinkande tydeleg på dette er ein av mange detaljar som berre har vorte viktigare og viktigare.

– Betyr det eigentleg noko?

– Ja, det er jo ein detalj. Dei beste definerer no fleire ting som viktig. Det blir enda meir snakk om detaljane, og ikkje minst at vi ikkje lenger går med fluorsmurning. Det gjer at det set seg meir skit i skia, seier Golberg

Snøen kan øydelegge

For før sesongen 2023/24 trådde nemleg eit forbod mot fluorhaldig skismurning i kraft. På same tid vart ein ny regel også innført i sprintlangrenn: Kvar skiløpar må bruke same skipar frå og med kvartfinalen.

Det betyr at løparane må gå på same skipar heilt fram til ei eventuell finale.

Smørjarane kan likevel legge på ny smurning mellom heata, men skiparet må altså vere det same.

Og det er altså difor mange skiløparar dansar seg ned i fart: for å spare skia og smurningen for slitasje.

– Aggressiv snø kan ta bort ganske mykje av festesmørjinga, men også denne glidesmurningen som er i glidsonen (på skia) slitast av skrensinga, seier NRK sin langrennsekspert Pål Golberg.

– Ikkje alltid det freistar

Erik Valnes brukar auga mykje for å planleggje fartssenkinga.

– Eg ser på snøen når eg eventuelt skal ploge. Eg ser etter at snøen skal vere veldig laus der eg gjer det. Eg prøver i alle fall å ikkje skrense på is. Da øydelegg du jo, seier Valnes og forklarar at han ikkje alltid orkar å sette hoftene i «dansemodus»:

– Det med den rulleski-bremsinga når du er stiv: det er ikkje alltid det freistar. Men ein må jo nesten prøve å spare der ein kan, seier han.

Johannes Høsflot Klæbo forklarar at det heile nok har vorte ein vane. På Beitostølen fredag meiner han at det nok ikkje særleg stor betydning.

– Slik som i dag er ikkje den verste dagen. Det er relativt lite slitasje i dag. I alle fall for min del trengte eg ikkje å legge noko smurning undervegs i dag. Men på dei verste dagane kan det ha litt å seie, seier Klæbo.

Erik Valnes fortel at han er obs på dette i alle skirenn han går.

– Det er det same om ein går ein 10-kilometer eller ein 5-mil for den saks skuld. Det er stor slitasje på kunstsnø, og smurning må vi ha. Det er ein eigen kunst.

– Det med skrensing i målområdet er uansett viktig og bør vere ein ryggmergsrefleks, avsluttar NRKs langrennsekspert Pål Golberg.