Flyselskapa reagerer – Bygg heilt ny flyplass utan reserveløysing

Byggearbeidarane er i full sving med å bygge den nye flyplassen i Rana.

Men når flyplassen står ferdig, vil det berre vere innflygingssystem som nyttar GPS og satellitt (GNSS) som skal få flya trygt ned.

Det får Norwegian, SAS og Widerøe, Luftambulansen og Forsvaret til å steile.

– Å berre tilby satellittbaserte prosedyrar gjer innflyginga meir sårbart. Det aukar presset på pilotane, og kan også gje svakare regularitet, som igjen kan føre til økonomiske konsekvensar for flyselskapa, seier Per Hugo Nielsen i Norwegian.

GPS og satellittsystem har nemleg vist seg å vere sårbar for forstyrringar og blokkeringar av signal mellom anna frå Russland.

Samstundes finst det alternative system som ikkje er like utsett for forstyrringar.

Avinor har ikkje råd

Bakkebaserte innflygingssystem blir brukt på flyplassar for innflyging og landing i dårleg sikt. Systema blei utvikla etter 1945, og er brukt innan sivil og militær flyging i store delar av verda.

EASA (Det europeiske flysikkerheitsbyrået) hadde eigentleg planlagt å fase ut disse systema innan 2030, men vurderar no å vente med det.

Men Avinor har altså valt å ikkje installere på den nye flyplassen i Rana. Dei meiner satellittløysinga er god nok, og seier dei ikkje har råd til anna.

– Det kan bli eit problem både for sikkerheita, og regulariteten ved flyplassen, skriv Polarsirkelen Lufthavnutvikling (PLU) i brevet til Avinor.

Dei ber Avinor installere også bakkestyrt navigeringsutstyr, som til dømes instrumentlandingssystem, eller ILS, ved flyplassen.

Brevet er signert av flyselskapa SAS, Norwegian og Widerøe, i tillegg til Luftambulansen og Forsvaret.

Også Henning Tennes, seksjonssjef flysikring i Luftfartstilsynet, meiner at det vil vere dumt å kvitte seg med dei bakkebaserte systema.

Vil ikkje fase ut likevel

– Den usikre verdssituasjon gjer at ein ikkje berre kan stole på berre digitale verktøy, skriv Tennes i ein e-post til NRK.

Han fortel at det skal vere eitt sett av bakkebaserte system, i tillegg til GPS og satellittsystema, på flyplassane i Noreg.

– Blir den nye flyplassen i Rana den første flyplassen i Noreg som ikkje har bakkebaserte system?

– Foreløpig er det ikkje planlagt nokon bakkebaserte system, og det vil vere den første flyplassen av denne typen som ikkje har dette, ja.

– Kva tenkjer du om at flyplassen i Rana blir planlagt utan dette?

– Utgangspunktet til Luftfartstilsynet er at alle norske flyplassar med instrumentinnflyging også bør ha minst éin bakkebasert navigasjon, i tillegg til GNSS-prosedyrar.

Tennes legg til at Luftfartstilsynet har løpande dialog med Avinor og flyplassane om tematikken.

I tillegg til å kanskje utsette planane for å fase ut bakkebaserte navigasjonssystem, jobbar Det europeiske flysikkerheitsbyrået også med å utvikle system som er mindre sårbare for satellittforstyrringar.

– Kor lang tid vil det ta før noko nytt er på plass?

– Nokon tiltak kan kanskje bli sat i verk innanfor ein relativt kort tidsramme som eitt til to år, mens andre meir omfattande tiltak vil ta mykje lengre tid, seier Tennes.

Han legg til at all ny teknologi som skal inn i luftfarten krev omfattande testing, validering og sertifisering før det kan takast i bruk.

Avinor: – Har ikkje råd

Avinor skriv til NRK at dei baserer seg på at EASA førebels har vedtatt at satellittbasert innflyging er standard ved europeiske lufthamner.

Men det handlar også om pengar.

Det er i stor grad Stortinget som finansierer bygginga av flyplassen. Planane som ligg til grunn seier at flyplassen utelukkande skal basere seg på satellittbaserte innflygingar.

Det verker inn på kor mykje pengar Avinor får for å byggje flyplassen.

– Om Avinor skal utvide byggeprosjektet i Mo i Rana, må dette oppdraget kome frå statlege styresmakter, seier konserndirektør for regionale lufthamner i Avinor, Anders Kirsebom.

Han legg til at det ikkje er nokon tvil om at dette vil auke både kostnadar til investering og drift.

I tillegg vil det føre til terrenginngrep, og krev kontinuerleg vedlikehald og overvaking.

Samstundes meiner Kirsebom at flyplassen i Rana ikkje vil vere særleg utsett for jamming og spoofing.

– Dagens utfordringar med forstyrringar av satellittsignal er hovudsakleg avgrensa til område i Øst-Finnmark. Redundans i tilfelle utfall av satellittkapabilitet blir ivaretatt gjennom Avinors nettverk av lufthamner. Eit større tal vil ha bakkebaserte løysingar for å sikre robustheit, seier han.

– Flytryggleiken er godt ivareteken

Statssekretær Cecilie Knibe Kroglund i Samferdselsdepartementet skriv i ein e-post til NRK at Avinor legg opp til satellittbasert innflyging, i tråd med dei nasjonale føringane som ligg i Navigasjonsstrategien til EASA frå 2020.

– Men departementet har ikkje gitt særskilde føringar om at lufthamna skal vere utan bakkebaserte system.

Ho skriv at Avinor har opplyst at dei vil vidareføre eit tradisjonelt navigasjonspunkt i området i ein overgangsperiode. Dette meiner ho gir ei meir stabil løysing i perioden der både flyplassar og flyselskap i aukande grad går over til bruk av satellittbaserte system.

– Flytryggleiken er godt ivareteken uansett løysing, men dette kan ha tyding for regulariteten – altså kor ofte fly faktisk kan lande og ta av i dårleg vêr.