Jonathan har studie­start på golvet i ei kantine: – Mistenkte at det ville gå slik

12. august markerer studiestart i heile landet. Dagane før kjem endå ein og annan student inn dørene på Fantoft med flyttelass i trillekoffertar.

Den vesle studentbyen i Bergen skal huse om lag 2000 studentar det neste semesteret.

Òg dei som ikkje har funne sin plass – inntil vidare i alle fall.

Mange studentar rundt om i landet har ikkje fått seg ein plass å bu når studietida startar.

I Bergen har personalkantina på Fantoft blitt rigga om til sovesal også i år.

Bland dei som har slengt ut soveposen sin der er italienske Jonathan Dellago.

– Eg hadde jo ikkje vald dette, men det går greitt, seier han om den mellombelse innkvarteringa.

Dette er status i norske byar

Dellago studerer til vanleg kunst på Universitetet i Wien, men skal vere på utveksling i Bergen denne hausten.

Den siste månaden har han leita etter bustad i vestlandsbyen, både gjennom studentsamskipnaden og på den private marknaden.

– Det var eit slit å skrive til folk og håpe på svar, seier han om bustadjakta.

Og han er ikkje den einaste som har opplevd det som eit slit.

Tilbod om mellombels bustad er naudsynt i fleire studentbyar, stadfestar studentsamskipnadane NRK har vore i kontakt med helga før studiestart:

• I Oslo er det ikkje personalkantina, men ein lesesal som fungerer som sovesal. Fredag før semesterstart hadde 20 personar reservert dei 17 sengeplassane til ulike tider.
• I Ås har dei hatt sovesal med kapasitet til om lag 40 personar dei siste 15 åra. Den blir òg tatt i bruk i år.
• I Stavanger er dei kjende med sovesal-løysinga frå tidlegare år, men dei 27 som har meld interesse får i år mellombels innkvartering på innleigde dublett-rom.
• I Trondheim får studentane tilbod om billigare overnatting på hostell eller hotell ut august. Liknande tilbod finst òg i Tromsø.

Mange historier om huskrig

Situasjonen på bustadmarknaden for unge og studentar har prega overskriftene før studiestart i år:

• I byrjinga av august sto over 15.000 i kø for studentbustad
• Private utleigarar har opplevd rekordkøar på visning
• Samstundes vel fleire å leige ut til turistar
• Vanskeleg bustadmarknad gjer at somme prioriterer studiestad framfor studie
• Medan somme strekk seg langt økonomisk for å få bustad

– Eg har forstått det slik at det har vore problem med å busette studentar i Noreg, seier Dellago.

Sjølv var han glad for at han hadde sovesalen i bakhand medan han leita etter bustad.

– Det var godt å ha eit tryggingsnett medan eg leita etter andre ting. Eg mistenkte eigentleg at det blei sovesal frå byrjinga av.

• Mangelen er ikkje total – i Bodø har dei stort overskot på studentbustader.

Tidleg ute med sovesal

Dei tilsette ved studentsamskipnaden på Vestlandet var godt førebudde på innrykket til sovesalen.

Allereie tidleg i juli hadde dei rigga til eit par-og-tjue sengeplassar i personalkantina, og utvida årets tilbod med to tilstøytande møterom.

– Totalt er det 25 som har meld interesse for sovesalen, seier sal- og marknadssjef Christina Eikeland i Studentsamskipnaden på Vestlandet.

– Nokon har allereie funne seg noko anna og flytta ut, medan andre ikkje har flytta inn endå.

– Kjempeflaks

Om naudsynt kan studentar utan bustad bu på sovesalen på Fantoft ut august, fortel områdeleiar på Fantoft, Tord Hatland.

– Erfaringsmessig har dei fleste funne seg noko til dess, anten her hjå oss eller privat, seier han.

Men så lenge har ikkje Dellago tenkt å vere på sovesal.

– Eg hadde kjempeflaks og fann nokon på Facebook som ville framleige ein hybel medan dei var på utveksling. Så snart den er ledig flyttar eg inn der.

Det er fleire på sovesalen som går og ventar på at bustaden deira skal bli klar til innflytting, seier kunststudenten.

– Nokon flyttar inn, og nokon flyttar ut. Ein annan her har funne hybel, men ventar her i ein månad før han kan flytte inn.

At han må dele rom med andre under ei fadderveke med fleire seine kveldar, ser han ikkje veldig mørkt på.

– Det skal nok gå fint. Me er jo greie folk.