Magnus (27) gir ikkje opp jobbdraumen etter 400 avslag: – Må ta moglegheitene som kjem

– Eg får ikkje gjort så mykje med det, så eg kan ikkje bruke for mykje krefter på det. Eg må berre ta dei moglegheitene som kjem, seier Magnus Torve Sundland.

27-åringen frå Sandefjord har fem års idrettsstudiar og ein master i Sports management. Utdanninga kan brukast til administrasjon og leiing.

Likevel har inngangen til arbeidslivet blitt tøffare enn Sundland hadde trudd.

Det siste halvtanna året har han søkt mellom 300 og 400 jobbar, men utan å få napp.

– Det har blitt ein del intervju, men eg har liksom ikkje komme over den siste kneika, fortel han.

Grunngivinga han får, er manglande erfaring.

– Det er sikkert mange nyutdanna som får høyre det. Men eg har fått høyre eit par gonger at rullestolen har vore problematisk i forhold til kor kontoret er.

– Då skjønner eg at det blir litt oppoverbakke å få den jobben, seier han.

Sundland skulle ønske fleire kunne sjå kven han er som arbeidstakar, utan rullestolen.

– Å sjå meir på kvalifikasjonane ein har, enn kroppen eller stolen. Det er viktigare kva hovudet kan bidra med, seier han.

Halverer sjansen for jobbintervju

Mange tar kontakt med Likestillings- og diskrimineringsombodet om liknande situasjonar, fortel seniorrådgivar Andreas Erichsen.

– Forsking viser at om du nemner rullestolen din i intervjuprosessen, så er det 50 prosent mindre sjanse for at du blir kalla inn til intervju, seier han.

Det kan vere brot på diskrimineringsforbodet om ein ikkje får ein jobb og det kjem av funksjonsnedsettinga deira, påpeikar han.

Erichsen trur meir kunnskap er vegen å gå for å gjere fordommar til skamme.

– Då trur vi at det blir mindre skummelt og mindre risikofylt å tilsette personar med funksjonsnedsetting, seier han.

Usikre arbeidsgivarar

100.000 potensielle arbeidstakarar med funksjonshindring ønsker å jobbe, fortalde Norges Handikapforbund nyleg til NRK.

Samtidig er NHO klokkeklare på at arbeidslivet kjem til å mangle folk.

Bedrifter må bli flinkare til å tore å tilsette personar som treng litt hjelp i starten, meiner dei.

NHO jobbar for å trygge arbeidsgivarar og fortelje om moglegheitene.

– Det heng ofte saman med at dei er usikre. Eg trur vi kan avgrense dette ved at arbeidsgivar og personen jobbar saman ved å bruke hjelpemidla i Hjelpemiddelsentralen og verktøykassa som Nav har, seier Børre Tommy Jacobsen.

Han er seniorrådgivar i NHO Vestfold og Telemark.

Fekk sjanse i idrettsklubb

I september fekk Sundland ei halv stilling i idrettslaget Store Bergan i Sandefjord.

Jobben i idrettsklubben inneber små og store administrative oppgåver, som å søke midlar og koordinere prosjekt.

Dagleg leiar Ole Pedersen er glad for å ha Sundland på kontoret.

Samtidig er han ærleg på at det ikkje hadde vore mogleg utan lønnstilskot frå Nav.

– Vi er heilt avhengige av hjelp til tilrettelegging, slik at Magnus kjem ordentleg inn i det og får litt arbeidserfaring. På sikt er eg heilt overtydd om at det kjem til å lønne seg for oss òg, seier han.

Målet er ein 100 prosent stilling på sikt. Førebels veit dei ikkje kor lenge Magnus vil få lønnstilskot frå Nav.

– Men vi vil gjerne behalde Magnus, seier Pedersen.

Glad for å jobbe

For 27-åringen er det godt å ha ein jobb. Han var arbeidsledig i eit heilt år, og det tærte på.

– Det blir jo litt dølt etter kvart. Så det å ha noko å gjere og eit miljø å gå til, er veldig viktig, seier han.

Draumen er ein 100 prosent jobb, og han er positiv til å flytte til ein annan stad om han får jobb.

– Det er klart at om ein får høve til ei full stilling, må ein ta henne, seier han.