No skal Ap-topp Ingvild Kjerkol si framtid på Stortinget avgjerast

Ingvild Kjerkol møter på nominasjonsmøtet iført gullsko, men om ho har trua på siger vil ho ikkje svare på.

– Trur du at du vinn?

– Det får me snakke om seinare, svarar Ingvild Kjerkol på veg inn på nominasjonsmøtet i Trøndelag Arbeidarparti.

I mars blei ho einstemmig attvald til leiar for Trøndelag Ap, i april gjekk ho av som helseminister og no står stortingsplassen til Ingvild Kjerkol på spel.

Fleirtalet på fire personar i nominasjonskomiteen til Ap i Nord-Trøndelag vil ha Bente Estil på Stortinget medan eit mindretal på tre personar vil ha Ingvild Kjerkol.

For å sikre seg førsteplassen på nominasjonslista treng Kjerkol 67 av 133 stemmer.

Splitta Trøndelag om Kjerkol

Tidleg i nominasjonsprosessen til Ap i Nord-Trøndelag blei det klart at fleire store kommunelag ville vrake Kjerkol.

Så blei ho også vraka av fleirtalet i nominasjonskomiteen, medan kommunelaget i Steinkjer snudde og ønska Kjerkol inn på Stortinget likevel.

Og slik blei det ståande då nominasjonskomiteen leverte sitt endelege listeforslag som skal stemmast over på nominasjonsmøtet i dag.

Giske kan sikre seg stortingsplassen

Etter at Arbeidarpartiet i Nord-Trøndelag har avgjort kven dei vil ha på Stortinget er det Sør-Trøndelag som står for tur.

Åtte av ni medlem i nominasjonskomiteen og 14 av 20 kommunelag vil ha Per Olav Skurdal Hopsø på Stortinget.

Men Trond Giske har dei største kommunepartia i ryggen og fleirtalet av stemmene dersom alle stemmer slik dei har lova.

I tillegg til Trondheim Ap har Giske støtte i Røros, Oppdal og Malvik. Saman tel kommunelaga 71 delegatar på nominasjonsmøtet.

Av 133 delegatar treng kvar kandidat 67 stemmer for å få fleirtal og bli vald inn på stortingslista.