Adela vil at foreldre skal ha skjermtid – det er ho ikkje åleine om

– Mamma er litt mykje på telefonen, seier 11 år gamle Adela Marie Solvik.

Sjølv prøver mora å regulere hennar skjermbruk.

Men 11-åringen meiner at det burde også gjelde for dei vaksne.

– Eg synest det er litt dumt, foreldre burde også ha skjermtid, seier ho.

Det er mora også einig i.

– Ein merkar at ein sit mykje med ansiktet ned i telefonen. Og det går ut over kor mykje ein er til stades, seier Julie Madelen Solvik, mamma til Adela.

Barn i fersk undersøking: Legg vekk mobilen

Som mor prøver ho å vere lite på skjerm, sjølv om ho merkar at det kan vere vanskeleg.

– I samfunnet vårt i dag skjer nesten alt på skjerm.

Også barneombod Mina Gerhardsen har merka seg utviklinga. Ho viser til den ferske undersøkinga Barnebarometeret (ekstern lenke), der meldinga frå barn til vaksne er tydeleg: Legg vekk skjermen.

– Vi har i ei årrekke diskutert barns bruk av skjerm. Men denne undersøkinga viser at foreldre sjølv ikkje greier å legge frå seg skjerm og mobil når dei er samen med barna, sa Gerhardsen da undersøkinga vart lagt fram.

Nyleg kom dei nye råda for skjermbruk.

Der er eit av råda at vaksne bør redusere skjermbruk når dei er saman med barna.

– Mitt inntrykk er at barna vil at foreldre skal bruke mindre skjerm. Og foreldre vil at barna skal bruke mindre skjerm. Medan techgigantane vil at alle skal bruke mest mogleg skjerm, seier kunnskapsminister Kari Nessa Nordtun (Ap).

– Foreldre må vere til stades

– Det er viktig å vise barna at dei er viktige for deg.

Det seier Marte Selseng-Hagland, som er leiar for kommunalt foreldreutval i Stavanger.

Dei støttar barnas ønske.

– Barna må ha foreldre som er meir til stades, og vi ser at ungane søker blikket deira og ser om foreldra får med seg ting, seier Selseng-Hagland.

Ho peikar også på at ungane kjenner seg avvist og ignorert når foreldra brukar skjerm.

– Ungane sjølv etterlyser mindre skjermbruk for vaksne, og det er noko vi ønsker å jobbe meir med, for å få auka engasjementet.

Leiaren understrekar at det ikkje vil seie å kutte ut alt av skjermtid.

– Men ver til stades med ungane når ein er med dei.

– Ikkje lyg

Heime i Stavanger er både mor og dotter einige i at ein bør legge vekk telefonen når ein kan.

For i situasjonar der mamma hennar er på telefonen, synest Solvik at det vert stille og kjedeleg.

Og ho har ei oppfordring til foreldre.

– Om ein seier at ein jobbar når ein er på telefonen, ikkje lyg. Berre sei det som er sant, det trur eg er betre, seier Solvik bestemt.