Drapssikta i Vestnes-saka ville drepe to

Det var tysdag 22. oktober 2023 at ei kvinne blei funnen død og ein gut hardt skadd i ein bustad i Vestnes.

Ein mann i 20-åra blei pågripen av politiet og blei først sikta for grov vald med døden til følge. Seinare blei han sikta for å ha drepe mor si og for grov kroppsskade mot broren sin.

Mannen, som sit fengsla i ein institusjon, anka nyleg varetektsfengslinga. Denne blei avvist av Frostating lagmannsrett som meiner at det er fare for at mannen kan gjere seg skuldig i nye lovbrot om han blir sleppt fri.

– Lagmannsretten viser til den alvorlege siktinga som omhandlar to personar som mannen hadde nær tilknyting til og opplysningar i avhøyr der han bekreftar at han ønska at broren skulle døy, men at kreftene tok slutt, står det.

Det var TV 2 som først omtalte saka.

Rettssak planlagt i februar

Mannen ønska å bli flytta tilbake til omsorgsbustaden på Nordmøre, der han budde på før hendinga. Han meinte også at det ikkje var ei gjentakingsfare.

Dette er lagmannsretten ueinig i, og forkasta anken.

Retten viser mellom anna til ei rettspsykiatrisk erklæring gitt 24. januar i år som peiker på at mannen sin tilstand ikkje er betra trass medisinering, står det.

Rettssaka skal etter planen starte den 24. februar, men det har enno ikkje kome ein tiltale i saka. Det er venta at tiltalen vil kome innan kort tid.

Lagmannsretten meiner derfor at det ikkje er eit uforholdsmessig inngrep at mannen må sete fengsla til rettssaka startar.

På grunn av gjentakingsfaren meiner lagmannsretten også at det ikkje er eit alternativ å plassere mannen tilbake på omsorgsbustaden der han tidlegare budde.

Påtalemakta har tidlegare opplyst at det mest sannsynleg vil bli reist ei sak om tvungen psykisk helsevern.

NRK har førebels ikkje kome i kontakt med forsvararen til mannen.

Skal ha høyrt stemmer i hovudet

I ei tidlegare rettsavgjerd frå Møre og Romsdal har det stått at den sikta mannen har sagt i avhøyr at han ønskte å drepe si eiga mor og bror sin, men at han ikkje veit kvifor:

«Han har stemmer i hovudet som seier kva han skal gjere ...».

Mannen har tidlegare vore sikta for vald og truslar mot mora i 2022. Denne saka blei lagt vekk.

Mannen skal også ha trua mor og søsken med kniv og uttalt at «de kjem til å døy» eller liknande. Ved eit tilfelle skal han ha slått mora i hovudet.

Mannen var også sikta for å skalle ein tilsett ved ein institusjon i ansiktet, og han var sikta for å bere kniv på offentleg stad. Saka blei lagt bort av politiet året etter på grunn av tvil om han var tilrekneleg.