Folk slåst for å få tak i monster­bamsane

Dei er kjend for sitt tannrike og litt skumle smil.

Labubu er små fluffy alveliknande bamsar som har gått viralt.

Labubu er små bamsar som du kan pynte veskene dine med.

Shilan Sari / NRK

– Det er ein veldig gøy trend å kunne pynte veskene sine med bamsar!

Det seier Malin Lossius Sørensen til NRK.

Ein leiken trend

Mange kjenner Lossius Sørensen som Facebymalin på sosiale medium.

På TikTok har ho over 43.000 følgarar.

– Dette er ein morosam trend!

Shilan Sari / NRK

Influensaren er blant dei som har slunge seg på trenden.

– Eg har alltid likt asiatisk kultur, og vore glad i å vise det fram.

Etter å ha oppdaga Labubu, fekk ho ein ven frå Kina til å kjøpe for ho og sende dei til Noreg.

Lossius Sørensen synest det er kjekt at ein leiken trend tar av – også i Noreg.

– Eg trur Noreg har godt av litt meir leikne trendar.

– Dette er ein morosam trend som er veldig forfriskande, samanlikna med alt det beige og vanlege som trendar her, fortel influensaren.

K-popstjerne gav bamsen medvind

Den virale monsterbamsen blei for alvor kjend etter at k-popartisten Lisa frå Blackpink, uttrykte sin kjærleik for figurane.

– Labubu blei veldig populær etter at Lisa blei sett med dei først, forklarar Lossius Sørensen.

– Seinare brukte Rihanna ein rosa ein, og sidan har det balla meir og meir på seg.

Monsterbamsane skaut fart etter at fleire store namn pynta veskene sine med den kinesiske kosebamsen.

Kim Kardashian, Simone Biles, Lizzo og Dua Lipa er også eigarar av monsterbamsen.

Labubu sin popularitet har ført til at store motehus lagar sine eigne versjonar.

Luksusmerket Fendi viste fram sine eigne versjonar av det som liknar på Labubu på moteveka i Milano.

Alessandro Garofalo / Reuters / NTB

Det populære veske-tilbehøyret dukka opp under motevekene i Milano og Sydney.

Luksusmerket Fendi er blant dei som har laga ein tilsvarande variant av Labubu.

Knyter menneske saman

Men kvifor fenger Labubu i så stor grad?

– Vi bruker ting for å knyte oss til andre ting eller menneske. Du uttrykker din identitet og tilhøyrsle, og signaliserer ved å ha den tingen at du er ein del av flokken.

Det opplyser Anita Borch, sosiolog ved Forbruksforskningsinstituttet Sifo, til NRK.

Forskaren forklarer at menneske har behov for å vise seg fram gjennom gjenstandar.

Det for å vise at du er lik dei andre, og har ein plass i gruppa du ønsker tilpass i.

Men samling av gjenstandar kan også henge saman med skam.

– Nokon er knytt til ting, men har ikkje andre rundt seg som gjer det same. Det er knytt til skam ettersom dei står i fare for å bli utstøytt frå flokken, opplyser sosiologen.

Labubu på svartebørsen

Men populariteten kjem med ei bakside.

Kinesiske tollarar skal ha merka den store etterspurnaden av samleobjektet.

Kina sin tolladministrasjon delte i april ein video på det kinesiske sosiale mediet Weixin, der tollarar beslaglegg 318 Labubu-dokker.

– Passasjeren opplyste at formålet var å selje figurane for profitt, skriv tolladministrasjonen på sosiale medium.

Tolladministrasjonen opplyser ikkje om kva konsekvensar funnet vil ha.

Ifølge CNN skal kinesiske tollarar ha beslaglagt 462 bamsar så langt i år.

Eit samleobjekt i millionklassen

I Pop Mart sine butikkar kostar dei fleste Labubu-figurane frå omtrent 200 til 300 kroner.

Sjeldne og unike figurar kan ha ein prislapp på overkant av 1000 kroner.

Om du vil sikre deg ein brukt Labubu i Noreg, må du punge ut med alt frå 200 kroner til dei dyraste til i underkant av 7000 kroner.

Figurane kjem i såkalla mysterium-boksar, som skjuler kva design bamsane har.

I tillegg er det utgitt nokon «hemmelege» utgåver, der sjansen for å få tak i dei er éin av 72. 

Å opne slike mysterium-boksar på kamera har blitt populært på sosiale medium.

Fansen jaktar alle dei ulike designa som er utgitt.

Nyleg blei ein unik Labubu-figur selt for over 1,5 millionar kroner, på ein auksjon i Beijing.

Figuren er ein spesialutgåve, og del av «første generasjon» i The Monsters universet.

Den 1,31 meter høge figuren var blant 48 figurar som blei auksjonert bort.

Desse figurane er svært sjeldne, med berre nokon få eksemplar på verdsbasis.

Dei kinesiske dokkene har blitt vanskeleg å få tak i for ivrige fans.

Det har ført til smugling og vidaresal av monsterbamsane.

VG melde saka først.

Stor etterspurnad

Fleire fans strekk seg langt for å få tak i figurane.

Populariteten har ført til at Labubu har hamna på svartebørsen.

Fansen risikerer å kjøpe overprisa smuglarvarer, der mange av bamsane viser seg å vere ulovlege kopiar, melder CNN.

Falske Labubu blir omtala som Lafufu i sosiale medium.

Malin Lossius Sørensen synest det er trist overfor fansen at Labubu blir selde vidare for profitt.

– Eg tenker at vi må la dei som genuint er interessert i Labubu få moglegheita til å kjøpe dei, i staden for folk som berre vil tene pengar.

Influensaren håpar at folk viser omsyn medan dei handlar, og er bevisst sitt eige forbruk.

– Eg tenker også at du ikkje berre skal kjøpe Labubu fordi det er trendy. Du må synest det er gøy med ein slik trend, elles blir det mykje unødvendig forbruk.

Med nebb og klør

Det er ikkje berre i Thailand at Labubu fyk ut frå butikkane.

Dei populære figurane har i lang tid vore utseld i fleire butikkar verda over.

Også i Labubu sitt heimland, er mange butikkhyller tomme for monsterbamsane.

I Storbritannia har Pop Mart midlertidig stansa salet, etter at slåstkampar braut ut ved fleire utsal.

Førekomsten av slåsting over dokkene er ikkje unik for britane.

Også i USA har det vore meldt om slåstkampar i køar til Labubu-utsal.

– Vi skal ikkje trenge å slåst for å få tak i dei. Dersom du er villig til å betale, er dei ikkje så dyre, seier Malin Lossius Sørensen.

– Det er synd at det er knytt så mykje status til Labubu. Det finst mange nøkkelring-bamsar som er like kule, legg ho til.

Interessert i meir frå utanriks?

Høyr podkasten vår her: