Influensasesongen er i gang – FHI reknar med at mange blir sjuke framover

På NTNU i Ålesund kan ein høyre mykje hosting og harking i forelesingssalen, fortel student Kristine Hildre Dimmen. Ho er ein av dei som nyleg har vore sjuk.

– Totalt var eg sjuk i rundt 15 veker, det var ikkje noko gøy. Eg hadde ikkje lyst til å gå glipp av all undervisninga, så eg måtte berre møte opp, sjølv om eg var heilt tett i øyra og høyrde ingenting, seier ho.

Auke den siste veka

Og studenten er ikkje aleine. I dag varsla Folkehelseinstituttet (FHI) at vinterens influensautbrot er i gang.

Påviste influensavirus i prøver auka kraftig førre veke, frå 12 prosent i veke to til 18 prosent i veke tre, melder dei.

– Det har vore ei stor auke den siste veka. Det tyder på at smitta er i ferd med å bre seg ut i befolkninga. Vi reknar med at det er mange som kjem til å bli sjuke dei neste vekene, seier overlege Trine Hessevik Paulsen i FHI.

Både influensa A- og B-virus er i omløp. I tillegg er det smitte av luftvegsinfeksjonen Mykoplasma pneumoniae, RS-virus og ulike koronavirus.

– Det brukar å vere ulike luftvegsvirus- og bakteriar rundt oss på same tid, og slik er det også no.

– Ikkje for seint å vaksinere seg

FHI har tidlegare varsla at dei trur hovudtyngda av influensautbrotet blir i februar og i mars. Hessevik Paulsen seier at det framleis er for tidleg å seie kor stort utbrotet blir denne vinteren.

– Akkurat no ser det ut som om smitten er litt høgare enn på det høgaste tidspunktet i fjor, men samtidig har vi tidlegare sesongar der det har vore langt meir smitte. Det er vanskeleg å seie korleis dette vil utvikle seg.

Overlegen minner om at det enno ikkje er for seint å vaksinere seg, både mot influensa og covid-19.

– Særleg dei i risikogruppa. For vi kjem til å ha smitte sirkulerande rundt oss i mange veker.

Har innført munnbindpåbod

Molde kommune har sett seg nøydd til å innføre munnbind på den interkommunale legevakta på grunn av smitte. Dei har òg hatt dei første innleggingane på sjukehus med influensa.

– Det blir ein forventa oppgang når mange er samla i jula. Men vi er litt uheldige i år, med at fleire av dei litt harde virusa treff oss samtidig, seier konstituert kommuneoverlege, Marit Teigen Hauge.

I tillegg til at influensasesongen er i gang, ser dei ein auke i korona, mykoplasma, RS-virus og metapneumovirus. Mykje noro- og rotavirus har dei også.

At det er fleire virus og bakteriar som kan føre til luftvegssymptom samtidig er utfordrande, seier Hauge.

– Det er veldig ugunstig, og særleg for dei mest sårbare.

Ho ber difor folk om å bruke munnbind dersom dei har luftvegssymptom og skal oppsøke plassar som apotek, lege, offentleg transport eller andre stadar med mykje folk.

– Elles er dei gode råda; handhygiene med såpevask, hosting i papir eller inn i olbogen og å hugse at handsprit ikkje tek avføringsvirusa.

Prøver å halde seg friske

Tilbake på NTNU i Ålesund prøver studentane å gjere sitt for å unngå å bli sjuke.

– Eg går biomarin innovasjon, så vi har masse fokus på tran. Så eg har blitt meir bevisst på å få i meg alle vitamina mine, vere ute og fokusere på helsa mi. Og å vaske meg ofte på henda, seier Kristine Hildre Dimmen.

Anneli Berglund har klart å halde seg frisk så langt. Ho er litt redd for å bli sjuk på campus.

– Det spreier seg fort når ein sit ilag på forelesingar eller møtes på fest. Eg prøver å halde meg unna dei som eg veit er sjuke, og kle godt på meg når eg er ute, slik at eg held meg varm. Det trur eg er viktig.