KI-selskapa stuper i USA

KI-assistenten til DeepSeek ser ut til å overraske teknologiinvestorar over heile verda.

I løpet av måndagen gjekk appen forbi ChatGPT som den mest lasta ned gratis-appen til Iphone i USA.

Programmet brukar billegare databrikker og mindre datakraft enn konkurrentane, ifølgje selskapet. Dei opplyser at dei utvikla KI-assistenten på to månader og at det kosta under 6 millionar dollar, ifølge CNBC.

IT-rågjevar i Otte, Torgeir Waterhouse, påpeikar at dette er mykje mindre pengar enn OpenAI brukte på å lage ChatGPT.

Han trur dette har overraska marknaden, men meiner det er for tidleg å seie om DeepSeek kjem til å konkurrere ut ChatGPT.

– Eg trur vi må sjå bruken over tid. Tala no får veldig merksemd, noko som leiar til mykje bruk, som igjen gir meir merksemd og meir bruk, seier Waterhouse.

Nvidia stuper

I førhandelen måndag gjekk verdien til Nvidia ned 11,4 %.

Etter svært gode år for amerikanske teknologiaksjar har Nvidia vore det mest verdifulle selskapet i verda, målt i børsverdi.

Verdiauken har i stor grad kome av at databrikkene deira har vore rekna for å vere best eigna til å drive kunstig intelligens.

Det norske oljefondet eig 1,17 prosent i Nvidia. Ved nyttår var eigardelen verdt rundt 377 milliardar kroner. Oljefondet har også milliard-eigarskap i ei rekke andre amerikanske selskap som Microsoft, Meta og Amazon.

Brei teknologinedgang

KI-selskapa Broadcom og Marvell Technology får også gjennomgå før børsopning. Begge er ned rundt 11 %.