Kuttar ut produksjon av Salma-laks – 100 tilsette mister jobben

Det kjem fram i ei pressemelding frå Bremnes Seashore, selskapet som produserer det kjente varemerket.

Avviklinga av Salma-produksjonen vil føra til at 100 tilsette i konsernet blir direkte råka, heiter det i pressemeldinga.

Kommunikasjonsdirektør Simon Nesse Økland stadfester overfor NRK at dette betyr at dei mister jobben.

Kor mange av desse som jobbar i Noreg, er uklart.

– Dei jobbar i heile verdikjeda vår. Uvisst kor mange av desse som er i Noreg på noverande tidspunkt, men det er mellom anna på Bømlo, seier han.

Underskot

I pressemeldinga skriv Bremnes Seashore at Salma-satsinga har gått med underskot dei siste åra. Prognosane viser at dei vil gå med titalls millionar kroner i minus kvart over framover.

Derfor legg dei ned varemerket.

– Salma har vore eit eventyr som har sett norsk laks på verdskartet og skapt stor stoltheit i heile organisasjonen. Men økonomiske realitetar gjer at me ikkje lenger kan forsvara vidare satsing på Salma, seier, konsernsjef Linda Litlekalsøy Aase i pressemeldinga.

Dyrtid og kritikk mot regjeringa

Selskapet peiker på høge råvareprisar og auke kostnader etter at dei investerte i ein ny fabrikk.

Samstundes har salet gått ned.

– Dyrtid gjer at ikkje alle kan ta seg råd til høgforedla lakseprodukt, skriv dei.

Samtidig kjem dei med kritikk mot regjeringa.

– Det hadde heller ikkje vore til ulempe om styresmaktene hadde lagt betre til rette for norsk eigarskap og foredling i Noreg, mellom anna ved å unngå auka skattar og ved å styrka rammevilkåra for foredling, skriv selskapet i pressemeldinga.