Skademarerittet fortset – EM kan ryke for Ingebrigtsen

– Det kan eg ikkje kommentere på noverande tidspunkt.

Det svarer Ingebrigtsen-brørne sin rådgivar, Espen Skoland, på spørsmål frå NRK om Jakob Ingebrigtsen kjem til å stille til start under EM i Birmingham.

– Ei avgjerd vil eventuelt bli tatt tett opp mot meisterskapen, fortset han.

– Jakob ønsker ikkje å sette noko forventning som ikkje kan følgast.

Og forventningane til Ingebrigtsen var høge for fleire før VM i Tokyo i 2025. Det var lenge usikkert om han i det heile skulle delta også der, da han ikkje hadde sprunge eit einaste løp den sesongen på grunn av ein vond akilles.

Det resulterte i at han rauk ut i forsøket på 1500-meteren og kom på ein 10. plass på 5000-meteren.

– Dei fleste har sagt at det ikkje er lurt, men eg er ikkje ein person som trekker meg. Eg er her for å konkurrere. Eg er her for meg sjølv og for ingen andre, sa Ingebrigtsen den gongen.

I 2024 blei Ingebrigtsen historisk da han tok sitt sjette EM-gull. Ingen mannleg friidrettsutøvar har tidlegare klart det. I år er det altså usikkert om han skal delta i meisterskapen i august.

Må kjenne seg klar

Den vonde akillesen blei i starten av 2026 operert. Sidan den gongen har det gått i opptrening, og akkurat no er Ingebrigtsen på treningsleir i høgda i St. Moritz.

Agenten til 25-åringen, svenske Daniel Wessfeldt snakka sjølv med Ingebrigtsen for to veker sidan.

– Det er berre han sjølv som kan bestemme når han kjenner seg klar, og da får vi sjå når det blir, seier Wessfeldt til NRK.

– Kan det vere at han ikkje kjem til å springe noko som helst denne sesongen?

– Det håpar eg ikkje. Eg håpar han kjem til å gjere nokre bra greier i år, men kjenner eg Jakob rett, så vil han vere heilt førebudd – ikkje berre stille opp, fortset han.

– Da er det framleis mogleg at han stiller til EM?

– Kanskje. Eller kanskje blir det litt etter det. Som sagt, det er berre han sjølv som kan seie frå når han er klar.

– Så litt usikkert med EM?

– Det er usikkert med alle ting, men går alt som det skal, så kan det bli EM. Eller så blir det litt seinare når dei andre store stemna kjem i august og september, fortel manageren.

– Må ikkje sjå Jakob i år

NRK sin friidrettsekspert Vebjørn Rodal seier Ingebrigtsen har eit skyhøgt potensial når han berre får gjort jobben på trening, og at det ikkje hastar med å få han med i konkurransen raskast mogleg.

– Eg tenker at det viktigaste ikkje er å få Jakob i konkurranse på halv maskin. Det viktigaste for Jakob er å få trene skadefri og smertefri dag etter dag og veke etter veke. Om konkurransen lèt vente på seg til neste sesong, så får det stå si prøve, seier han.

Rodal har VM-deltakinga til 25-åringen i Tokyo friskt i minnet.

– Det å utsette seg sjølv for ytterlegare skaderisiko med å skunde seg tilbake i løp, det treng ikkje berre vere positivt. Det viste han litt i fjor, da han tok VM litt på sparket utan å ha fått førebudd seg spesielt godt. Da blir han slått, får negative konkurranseopplevingar og forsterkar skadeproblematikk som ligg der, fortset han.

Om Ingebrigtsen droppar å løpe under europameisterskapen i Birmingham i august, er langt frå det viktigaste for OL-gullvinnaren frå Atlanta i 1996.

– For min del må eg ikkje sjå Jakob i løp i år. Det er viktigare for meg at han prøver å gjere det som skal til for at han kjem tilbake til der han var. Om det først skjer neste år, så lever eg fint med det, avsluttar Rodal.

• Friidretts – EM i Birmingham går 10–16. august og blir sendt på NRK.