Skip driv mot land på Vestlandet

Hovudredningssentralen (HRS) hjelper eit 90 meter langt skip som driv mot land ved Austevoll utanfor Bergen.

Alle naudetatane er varsla.

– Fartøyet har mista motorkrafta, og det er fare for at den kan drifte på land, seier Steinar Vatne i HRS til NRK.

Han karakteriser situasjonen som «uavklart», og avstanden til land som «nokre nautiske mil».

– Det er kort avstand i forhold til den vinden som er i området.

– Vurderer de å evakuere mannskapet om bord?

– Det er for tidleg å spekulere i nå.

Ifølge Bergens Tidende er det snakk om eit lasteskip ved namn «Wilson Rotterdam».

HRS har sendt helikopter og båtar til staden for å hjelpe skipet.