Slik får du juletreet til å vare lengst mogleg

4 months ago 33

Sjølv om stadig fleire vel kunstige tre når dei skal pynte til jul, er det framleis ein god del som held seg til den naturlege varianten.

Siv Iren Sørensen-Moe, som er kommunikasjonsansvarleg i Norsk Gartnerforbund, trur mange er opptatte av tradisjonar når det skal feirast jul.

– Eg trur mange vil ha lukta og kjensla ein får av å ha eit ordentleg juletre i huset.

Det same erfarer juletreprodusent Lars Klevsgård Hobæk ved Østre Nystein gard i Bamble.

– Det er faktisk fleire som kjem og vil byte ut plasttreet sitt med eit ordentleg juletre.

Vel rett tre

Øvst på sjekklista for å få eit fint juletre gjennom heile høgtida er å finne eit som ser friskt og fint ut.

I tillegg kan det vere lurt å bruke fingrane for å sjekke at treet ein har sett seg ut ikkje har begynt å drysse.

– Vel ein ei vanleg gran, sit nålene litt lausare enn om ein vel ei edelgran, seier Sørensen-Moe.

Skjer bort ein bit av stammen

Når du har fått med deg treet heim bør det blir kutta 1,5 til 2 centimeter av stamma, anbefaler Klevsgård Hobæk.

Grunnen er at porene til treet har lett for å tette seg etter felling, forklarer han.

– Når ein skjer eit nytt snitt opnar ein porene på nytt.

Sett av tid til akklimatisering

Treet bør ikkje settast rett inn i stua, men plasserast i ei bøtte med vatn på ein stad der det er mellom 10 og 15 grader, anbefaler Hobæk.

– Der ville eg late det stå i eit døgn. Det viktigaste er at bøtta ikkje går tom for vatn. Eit tre kan fort trekke 3 til 5 liter vatn i løpet av eit døgn.

Gi treet nok vatn

Vatn er viktig, også når juletreet har komme heilt inn og er på plass i foten. Hell gjerne varmt vatn oppi, for det likar treet best.

– Det handlar om å vatne jamt. Sjekk gjerne dagleg at treet har nok vatn i foten, seier Sørensen-Moe.

Viss alt vatnet er borte bør ein helst skjere ein ny bit av stamma. Dette for å opne porene på nytt, meiner Hobæk. I så fall kan det vere lurt å få litt hjelp.

– Da kan ein løfte det opp og skjere av ein skalk.