Sophie Elise hyllar nynorsk: – Eg synest det er vakkert

– Eg har lese litt bøker på nynorsk her og der, men det er først i det siste eg har «tatt av», og les i overvekt bøker på nynorsk, seier ho til NRK.

På Instagram og Snapchat når ho ut til nær ein million menneske. Gjennom hausten har ho posta fleire innlegg om at ho les bøker på nynorsk – og elskar det.

Mange har eit trøblete forhold til nynorsk. Politikarar ønsker å fjerne sidemål, og frustrerte elevar meiner nynorsk øydelegg karaktersnitt og framtida til dei unge lovande.

Tal frå Statistisk sentralbyrå viser at det dei siste tretti åra har gått éin veg med nynorsken.

Nedover.

Frå 1992 til 2023 er nedgangen i andel elevar i grunnskolen med nynorsk som hovudmål på 6,4 prosentpoeng.

Kanskje er det nettopp litt framsnakk frå ei av landets mektigaste kvinner nynorsken treng.

– Dette er berre positivt

Noregs Mållag bikka denne veka 16.000 medlemmar. Det er det høgste talet sidan 1985. Leiar i Noregs Mållag, Peder Lofnes Hauge, trur delinga til Sophie Elise kan ha positiv effekt på nynorsken sin posisjon.

– Eg trur Sophie Elise er ei viktig stemme for dei som følger ho. Då kan det nok ha stor betyding at ho så aktivt oppfordrar sine følgarar til å finne nynorske litteraturskattar.

Han ser ikkje vekk ifrå at omtale frå Sophie Elise kan sende eit signal om at litteratur på nynorsk også er bra litteratur.

– Dess fleire som får auga opp for nynorsk litteratur, dess fleire vil lese den, sette pris på det og kanskje anbefale det vidare til sine venner. Dette er berre positivt.

– Er det aktuelt å gjere eit samarbeid med ho i framtida?

– Det har vi faktisk ikkje tenkt på eingong. Men akkurat no gjer ho jobben for oss veldig godt, så vi får vere glade for det, seier han med eit smil om munnen.

Har mangedobla salet

Direktør i Bokhandlerforeningen, Anne Schiøtz, seier det er vanskeleg å stadfeste kva faktorar som spelar inn på boksal.

– At ho snakkar om og opp bøker, er nydeleg. Viss det også kan få fleire til å lese på nynorsk, er ingenting betre enn det.

Det viser seg at bøkene Sophie Elise har omtalt, faktisk har gått opp i sal i haust. Om det er fordi dei er anbefalt av Isachsen, eller om det er det nynorske språket som er trekkplasteret, er vanskeleg å seie.

NRK har spurt forlaga til dei ulike bøkene Sophie Elise har omtalt denne hausten korleis det har påverka salet.

– Treffer på ein annan måte

Sophie Elise fortel at mange av følgarane hennar er takksame for at ho deler bøker frå nynorske forfattarar. Spesielt dei som har nynorsk som hovudmål. Det er fleire som deler kjærleiken for dei nynorske bøkene.

– Det er noko med det skriftspråket som kjennest veldig norsk, spesielt skildringar av norsk natur når det er skrive på nynorsk. Det treffer på ein annan måte enn bokmål. Utan at eg kan forklare kvifor. Det er nesten instinktivt at det kjennest betre.

– Du er jo sjølv forfattar, er det aktuelt for deg å skrive nynorsk i framtida?

– Mitt eige språk er nok hakket rikare på bokmål. Der har eg eit større vokabular. Nynorsk skal eg etterlate til dei som er best på det, så får eg heller vere ivrig fan på sidelinja!