Svensk VM-stjerne opnar opp om isfront: – Klæbo såg ikkje på meg i det heile tatt

– Vi er vel ikkje bestevennar, for å seie det sånn, seier Edvin Anger.

Svensken vann sprinten i franske Les Rousses tidlegare i januar, men då stilte ikkje Klæbo, som er stor VM-favoritt på heimebane.

No avslører Anger til NRK at han og Klæbo på ingen måte har funne tonen.

– Eg merkar at han ikkje synest det er veldig kult at det kjem ein svenske som heilt plutseleg kan slå han.

– Korleis merkar du det?

– Det kjenner ein. Det kan verke som eg er den siste han vil bli slått av. Men det skal jo vere rivalisering. Eg vil jo også berre slå han, seier svensken.

Og legg retorisk til:

– Kvifor skal eg vere venn med min verste konkurrent?

Følte seg oversett

Edvin Anger fortel i samtale med NRK også om ein konkret episode med Klæbo.

Etter at svensken hadde gått frå Klæbo over siste bakketopp under jaktstarten i Toblach, skulle dei to skandinavane stå saman på sigerspallen.

Anger på nest høgste trinn og Klæbo på det tredje høgste.

– Eg trur ikkje han såg på meg i det heile tatt, seier Anger.

På oppfølgingsspørsmål om episoden i Toblach, seier Anger at Klæbo «kanskje mumla noko, men eg opplevde det slik at han ikkje såg på meg».

Ifølgje Anger sa ikkje Klæbo «bra jobba» eller noko slikt.

Klæbo om svenskesuksess: – På tide

Johannes Høsflot Klæbo seier til NRK at han ikkje kjenner seg heilt igjen i Anger sin versjon av episoden i Toblach.

– Men eg bryr meg svært lite om det. Det er artig at Anger har begynt å gå litt fort. Det er på tide. Og det er bra at svenskane får opp nokon. Det er viktig for sportens del. Eg er berre glad for det, seier Klæbo.

Han legg til at Edvin Anger har vist potensial i mange år og brukt tid på å kome seg opp i verdseliten.

– No har han både pallplass og verdscupsiger. Det begynner å likne noko, skryter nordmannen.

På «svartelista»

Tidlegare har NRK skrive om dei svenske kvinnene si «svarteliste» over løparar dei prøver å unngå i feltet.

Anger er sikker på at Klæbo har han på sin liste.

– Det verkar som om nordmennene hatar oss, og at verken Klæbo eller Amundsen likar meg eller «Wille» ute i sporet.

Denne kritikken går ikkje spesielt hardt inn på Klæbo.

– Dei får styre og halde på med det. Eg kjenner eg bryr meg lite om det, er svaret frå Klæbo.

– Ingenting imot han

Sjølv om Anger ikkje har særleg mykje kontakt med Klæbo, brukar han ingen vonde ord om nordmannen.

– Eg har ingenting imot han. Han er verdas beste skiløpar og har alt press på seg før VM. Det ville ha vore stort å slå han, varslar svensken.

– Kva er det mest irriterande med Norge?

– At dei trur dei er så jævlig gode. Og det er det vi skal prøve å få endre på.

– Korleis merkar ein det?

– På alt. Dei gjer aldri nokon feil i fellesstart, og dei er så snille mot kvarandre. Og så gjer dei aldri noko ut av seg i media. Etter at Petter slutta har det vore tyst i media. Dei må steppe opp der også, er beskjeden frå Anger.

Siktar mot sprinten

For Anger er sprinten i Trondheim VMs det store målet.

– Om alt fungerer og kroppen er bra, så skal løypa passe meg fint, seier Anger.

Hans einaste verdscupsiger kom i sprinten i Les Rousses.

Men der stilte ikkje Johannes Høsflot Klæbo, som har vunne sprinten i dei tre siste verdsmeisterskapa – i tillegg til OL både i 2018 og 2022.

VM på ski går frå 26. februar til 9. mars.