Taxisjåfør i Tromsø dømd for valdtekt av passasjer

Natt til 27. april i fjor skulle ei ung kvinne heim frå byen. Ho bestemte seg for å ta taxi heim.

Klokka 02, natt til søndag, sette ho seg inn i bilen, og 06.30 var ho ute av han.

Ho blei ikkje køyrt heim. Ho blei heller køyrt frå Tromsø sentrum og ut til bygda Jøvik. Det tar 1 time og 45 minutt dit.

Eitt år etter denne taxituren blei det tatt ut tiltale mot sjåføren. Sjåføren erkjente ikkje straffskuld – heilt til helga før rettssaka skulle starte i Nord-Troms og Senja tingrett.

Da endra han nemleg forklaring, og erkjente at han hadde tatt med seg den berusa kvinna, tatt ho med seg langt heimefrå og at det i bilen hadde skjedd ei valdtekt utan samleie.

Aktor Kirsti Jullum Jensen la ned påstand om fengsel i to år og åtte månadar. I tillegg la ho ned påstand om at han skal miste taxiløyvet, førarretten og at han ikkje får kontakte kvinna.

Særleg skjerpande

Kvinna sin bistandsadvokat Beate Arntzen ville også at mannen skulle betale 263.000 i oppreising og erstatning til kvinna i 20-åra.

Dommaren har no landa på at han skal straffast til fengsel i to år og seks månadar.

Dommar Stig Valhammer har også bestemt at mannen aldri får køyre taxi igjen. Han mistar også sertifikatet i tre år. Han må ta førarprøven heilt på nytt om han skal køyre bil igjen etter å ha sona.

Overgrepet i bilen skal ha skjedd minst to gonger, står det i dommen, og skriv at det som er særleg skjerpande:

«... er at siktede var edru og at han kjørte fornærmede langt ut av byen mens han begikk overgrepene. I tillegg tilkommer det at han var drosjesjåfør, og misbrukte den tilliten som kjøreseddelen har gitt han.»

Han må betale 263.748 kroner i erstatning til den fornærma kvinna i 20-åra, og han har kontaktforbod i fem år.