Tech-gigantar i kneståande etter kinesisk KI-framstøyt

Måndag sende det kinesiske KI-selskapet Deepseek den amerikanske marknaden og tech-gigantar nedover på børsen.

Fleire store teknologiselskap og teknologifond gjekk med tap:

• Nividia
• Broadcom
• Micron Technology
• Microsoft
• Meta
• Alphabet

Databrikkeprodusenten Nividia gjekk ned 17 prosent på den amerikanske børsen og mista dermed 600 milliardar dollar i verdi på eitt døgn.

Det er dryge 6600 milliardar norske kroner.

Og dette var på grunn av den kinesiske utfordraren Deepseek.

Ein nykommar

Deepseek er ein kinesisk KI-leverandør som den siste tida har overraska med kor billig dei greier drive språkmodellen sin. I løpet av januar i år har Deepseek gått forbi Chatgpt som den mest nedlasta gratis-appen i USA.

– Dei bruker kanskje 90 prosent mindre datakraft, seier Ivar Harstveit, fondsforvaltar i Storebrand om forretningsmodellen deira.

Deepseek driv ein såkalla språkmodell. Han kan du spørje om kva som helst og han vil då saumfare alt av kjelder på internett og kome med eit meir eller mindre «balansert og riktig» svar.

I jula lanserte Deepseek sin V3-modell som var på høgde med dei største amerikanske KI-selskapa Google og OpenAI. Men dette var med berre ein liten del av kapasiteten som dei leiande KI-selskapa bruker i sine språkmodellar.

Det er Nividia som er leiande innan databrikker. Dei står for nærare 90 prosent av databrikkene i bransjen ifølge The New York Times.

Medan tech-gigantane bruker store datamaskiner med rundt 16 000 databrikker for å trene modellane sine, bruker Deepseek berre 2000 brikker.

Kina har amerikanske sanksjonar og eksportrestriksjonar mot seg, det har gjort at dei kinesiske selskapa må tenke nytt.

Og det har truleg fungert enn så lenge, men nokre spekulerer i om tilsiget er midlertidig.

Norske småsparar ikkje like råka

Også norske fond har store verdiar i dei amerikanske tech-selskapa. Oljefondet eig aksjar for mange milliardar i KI-selskap som Nividia.

Ifølge Finansavisen fall Oljefondets verdiar frå over 20.000 milliardar kroner til 19.400 milliardar kroner før den amerikanske børsen opna måndag.

– Det har vore store utslag som har råka selskap som er eksponert mot spesielt datasenterutbygging relatert til kunstig intelligens, seier Hartveit om utviklinga det siste døgnet:

– Det er veldig lenge sidan vi har sett rapporteringsdagar med så store og breie utslag.

Når Oslo Børs opnar tysdag er det ikkje forventa at det skal gi noko særleg utfall.

– Marknadane har vore USA versus resten av verda. For Oslo Børs, som primært er råvarer og energi, så vil det i utgangspunktet ikkje ha så mykje å seie fordi det er veldig få teknologiselskap eksponert mot KI på Oslo Børs:

– Med mindre dette skulle sette i gang et veldig stort børsfall.

Harstveit seier at ein ser dette utslaget børsane i USA og Europa. I morgontimane kan ein også sjå det i Asia.

– Tokyo-børsen har nokre leverandørar som gjekk ned i går. Ikkje like mykje som Nvidia, men den fell vidare i dag, legg Harstveit til.