Vått i Nordland – elles flott vêr under VM-kampen

Over heile landet er det klart for VM-fest søndag kveld. Den avgjerande fotballkampen mellom Noreg og Brasil er ein kamp som svært mange vil få med seg.

Mange skal sjå fotballkampen heime i si eiga stove, men tusenvis av menneske kjem til å samle seg framfor ein storskjerm under open himmel.

I fleire byar blir det rigga til gratis folkefest.

I Oslo er det på Rådhusplassen det skjer. I tillegg kjem dei mange kommersielle arrangementa både innan- og utandørs.

Mange arrangørar har kasta seg rundt og rydda plass til fleire gjester enn det som først var planlagt. Fleire byar melder om enorm interesse.

– Når klokka nærmar seg 22, er det nydeleg vêr mange stader i Sør-Noreg. For Trondheim sin del får vi håpe at nedbøren gir seg til kampstart, seier statsmeteorolog Kristian Gislefoss ved Meteorologisk institutt.

Han fortel at nedbørsområdet vil flytte seg nordover i løpet av kvelden.

– Store delar av Nordland vil nok ha regnvêr. Men kjem du lenger nord, til Troms og Finnmark, kan det nok komme ei og anna regnbye, men elles blir det opphald og nydeleg midnattssol i store delar av Finnmark.

Ponchoar til dei som står ute

I Bodø planlegg Sportsbaren å vise kampen både inne og i eit telt. I tillegg er mogeleg å sjå kampen i friluft utanfor teltet.

– Det er ikkje meldt så dårleg vêr som det har vore på dei tidlegare kampane. Ikkje så mykje vind heller, så eg trur nok det går ganske greitt å stå ute. Vi har kjøpt ein del regnponchoar som vi kjem til å dele ut til dei som står ute, seier dagleg leiar Kjetil Linchausen.

Han fortel at det har vore oppe i full storm tidlegare når dei har vist VM-kamp.

– Vi har nok ikkje vore så heldige som dei har vore andre stader i landet. Folk har jo blitt våte, men dei fleste har hoppa og dansa og vore med i kampen. Skjermen ute står på ei svær vogn som skjermar for vinden, så det har gått ganske greitt.

Statsmeteorolog Gislefoss har følgjande råd til folk i Bodø som skal sjå kampen under open himmel:

– Det er å køyre på med ein poncho, og så er det å glede seg over spelet. Eg håpar verkeleg det kjem til å varme.

Men det er ikkje berre i Nordland at folk må førebu seg på nedbør. Kristian Gislefoss kan melde at det ser ut til å bli grått og litt vått også på den nordlege delen av Vestlandet.

Behageleg temperatur

– Det vil nok vere nokre regnbyer her. Men dersom ein er heldig, blir det eit lite vindauge med opphald under kampen. Det er nok likevel større sjanse for at det er ei regnbye der enn at det ikkje er det, seier han.

Gislefoss melder om behagelege temperaturar den kommande søndagskvelden.

– Det blir ein veldig fin kveld på Austlandet, 19 grader i Oslo ved kampstart. Temperaturen vil jo falle litt utover, men her blir det eigentleg ganske godt og varmt. Det blir bitte litt lågare temperatur på Sørlandet. Resten av landet vil nok ha det ein god del kjøligare. Sjølv om det blir mykje fint vêr i Finnmark, så vil nok temperaturen her liggje på 14–15 grader, seier han.