Avbraut bystyremøte saman med elevar: – Eg vil gjerne seie unnskyld

I går storma Andreas Høy Knudsen inn under bystyremøtet i Stavanger kommune for å demonstrere mot skulekutt. Med seg hadde han kring 40 elevar.

Tysdag seier han til NRK han vil be om unnskyldning.

– Eg har tatt kontakt med ordføraren sitt kontor, seier Andreas Høy Knudsen.

– Eg var så rasande at det tok av. Eg vil gjerne seie unnskyld til han, fortset han.

Som konsekvens har han også fått ein negativ reaksjon frå ein av foreldra til barna som var med. Ein forelder har også tatt kontakt for å gi støtte, seier Høy Knudsen.

– Utruleg ugreitt

Ordførar Tormod W. Losnedal (H) reagerte kraftig på avbrytinga måndag.

– Det er utruleg ugreitt å ta over ein demokratisk institusjon som bystyret på den måten. Det er i strid med kommunelova, seier ordføraren til NRK etter hendinga måndag.

– Han kan avvise meg, men da eg gjort det eg kan, seier Høy Knudsen.

Høy Knudsen er FAU-representant ved St. Svithun skole i Stavanger. Årsaka til avbrytinga var for å demonstrere mot kutt i skulen.

Det var etter Høy Knudsen såg videoen frå bystyret at han reagerte.

– Då gjekk det opp for meg at det gjekk litt langt. Men eg er veldig opptatt av denne saka.

– Ei klok avgjerd

FAU-leiaren seier ho ikkje stiller seg bak det Høy Knudsen gjorde, men seier det er fint at han no vil seie unnskyld.

– Det synest eg er ei klok avgjerd, seier FAU- leiar ved St. Svithun, Anna Maria Oanes.

Oanes har etter hendinga har fått fleire reaksjonar frå foreldre.

– Foreldre er bekymra for korleis dette vart gjort, seier Oanes til NRK.

Om elevane visste kva dei var med på, kan ho ikkje gje eit svar på dagen etter.

– Nøyaktig korleis ting har blitt gjort veit eg ikkje, men dette arbeider vi no med å finne ut av, seier ho.

FAU-leiaren er tydleg på at styret ikkje støttar handlinga til Høy Knudsen.

– Vi visste heller ikkje om dette på førehand. Dette såg eg fyrst i media, seier Oanes.

Bør seie unnskyld til fleire

– Det er fint at han seier unnskyld, men det er nok fleire han bør seie unnskyld til, seier Marit Vibe Bakken, som er styreleiar for kommunalt foreldreutval i Stavanger.

Ho siktar mot at FAU ved St. Svithun ikkje var informert, og etter tilbakemeldingar frå foreldre var det truleg fleire av dei som heller ikkje var godt nok informerte om demonstrasjonen.

I kveld skal KFU-styret i Stavanger ha møte der saka blir teke opp.

– Det er litt opprydding som må til, seier KFU-leiaren.