Betydelig snøskredfare i Nordland

Operasjonsleiar i Troms politidistrikt, Karl Erik Thomassen oppfordrar folk til å vere forsiktige. Ein person vart i ettermiddag tatt av snøskred på Blåbærtinden i Balsfjord i Troms, melder han.

– Det er betydeleg snøskredfare i store delar av politidistriktet, og det er venta at faren aukar det neste døgnet. Vi fekk nettopp melding om ein person i eit turfølge på åtte, som vart i eit skred. Han hadde flaks og kom seg ut sjølv. Ver obs, og ikkje ta sjansar, skriv han i politiloggen søndag ettermiddag.

– Det vart utløyst av personen som vart tatt av skredet, seier han til NRK.

– Snøskredfaren har tatt seg opp frå tidlegare i veka og vil ta seg opp ytterlegare, legg operasjonsleiaren til.

Vaktleiar i snøskredvarslinga til NVE, Håvard Toft fortel til NRK at det kan kome store naturleg utløyste skred i Nord-Noreg nå, så store at dei kan stenge vegar.

Men det er ikkje berre i nord at folk bør vere forsiktige i fjellet no.

– Vi har betydeleg snøskredfare i store delar av Nordland og Troms og Jotunheimen, seier Toft.

Fleire stader i Nord-Noreg og i Jotunheimen går skredfaren ned att måndag og tysdag. I Trollheimen, Romsdal, Sunnmøre og Indre Fjordane aukar den derimot om to dagar frå liten til moderat

– Korleis skal skiløparar te seg når det er betydeleg snøskredfare?

– Det er ein alvorleg situasjon, og då er rådet vårt å unngå skredterreng heilt, det vil seie terreng som er brattare enn 30 grader og utløpssoner, svarar skredeksperten.

Snøskredfaren aukar også i Jotunheimen søndag.

Ifølge Varsom.no aukar skredfaren i takt med at vinden aukar til stiv kuling frå sør. Dette skaper ustabile forhold i fjellet.

– Det vil legge seg opp ferske flak over nedføyka kantkorn som vil vere svært lette å påverke. Unngå alt skredterreng, skriv Varsom.no, som altså har sendt ut oransje farevarsel for snøskred i området.