Brann i Vestnes - faren for spreiing til naboar skal vere over

Brannvesenet melder klokka 00.16 at det skal vere kontroll på staden etter at det begynte å brenne i ein firemannsbustad i Vestnes i Møre og Romsdal.

– Dei har akkurat meldt at dei har kontroll og driv med etterslokking. Dette var svært krevande, det var fullt overtent, opplyser Rian Morrison ved 110-sentralen til NRK klokka 00.17.

Han opplyser at brannvesenet no skal ta seg inn i leiligheitene og sjå til at varmen og flammane ikkje har spreidd seg vidare.

Klokka 23.12 blei det meldt om brann. Store styrkar rykte ut etter melding om opne flammar og brann som hadde spreidd seg til ytterkledninga.

Det var ei stund fare for at brannen skulle spreie seg vidare til dei andre leiligheitene i firemannsbustaden, via eit loft.

Det er knusktørt og gult farevarsel i Møre og Romsdal og fleire fylke etter ein uvanleg lang periode utan nedbør.

Bebuarar blir evakuerte

Ein person bur i leiligheita der brannen starta, medan det totalt bur tre i heile firemannsbustaden.

Alle skal vere ute og utan skade.

Det stadfesta politiet like før midnatt.

Politiet opplyser at dei tre som bur i bygningen blir evakuert og får tilbod om å bu ein annan stad inntil vidare.

Skal ha slått ned dei verste flammane

Ifølgje politiet klokka 23.34 var dei verste flammane då slått ned og brannvesenet jobba med å hindre spreiing til nabobustadene.

Politi, helse, restverdiredning fra Ålesund og e-verk også rykte også ut.

Det er svært tørt mange stader i landet. Laurdag har det vore fleire brannar i terrenget i Noreg.