Fekk att kameraet ni år etter at han mista det på fjelltur

Mai 2016. Sola skin. Det er shortsvêr. Ein perfekt dag for å gå Jostedalsbreen på langs.

Daniel Kvåle og to kameratar spenner på seg skia og legg ut på tur.

På vegen vil dei få med seg toppen av Kjenndalskruna, som ruvar 1830 meter over havet.

– Landskapet er heilt vanvitig flott og det måtte sjølvsagt dokumenterast skikkeleg, fortel Kvåle.

Han knipsar mange bilde med GoPro-kameraet sitt. Men etter skituren ned frå toppen, er det borte vekk.

– Me leita nok ein times tid etter det, men måtte gi opp då det var både ur og snø opp mot toppen, så det var umogleg å finna.

Lenge hadde han eit håp om at turgåarar skulle finna kameraet seinare i sesongen, men det skjedde ikkje.

Før no. Ni år seinare har det kome til rette.

Fann det i steinura

Janne Eikås var på veg til Kjenndalskruna tidlegare i juni då ho fekk auge på det vesle kameraet i steinura like før toppen.

– Eg lurte på kva vêrforhold personen som eigde det hadde hatt på akkurat same tur.

Ho tok det med seg heim. Etter litt googling og med god hjelp frå dottera og sambuaren, fekk ho lada det og kopla det til ein PC.

Det hadde vore godt beskytta av eit deksel, men overraskinga var likevel stor då det faktisk fungerte.

Eikås kom seg til Kjenndalskruna tidlegare i år. Like nedom toppen fann ho kameraet i ei steinur.

Janne Eikås

Dei klarte å overføre nokre av bilda, deriblant ein selfie av Daniel. Så posta Janne eit innlegg i ei turgruppe på Facebook.

– Eg fekk veldig raskt respons på innlegget. Så håpar eg at eigaren fekk att mange fine augneblink.

Kvåle fekk ei melding frå ein kjenning som hadde sett innlegget til Eikås.

– «Wow», tenkte eg, «korleis er dette mogleg». Like etter ringde ho meg og var minst like glad som meg for at ho hadde klart å finna ut kven som var eigaren, seier Kvåle.

Blitt påkøyrd av grasklippar og rygga på

Kvåle synest det er «ganske utruleg» at kameraet har overlevd ni vintrar på nesten 1830 meters høgde.

– Vi veit at GoPro er laga for å tole ein støyt eller to, men å overleve i nesten ti år på fjellet set verkeleg ein høg standard for haldbarheit, seier Arianit Dervishi, kundeansvarleg hos Response Norden, som er distributør av GoPro i Norden.

Han har tidlegare høyrt om kamera som har overlevd alt frå å bli rygga på av ein bil til å hamne under ein grasklippar, men ingenting i nærleiken av det Daniels GoPro har vore gjennom.

– Eg vil seie at dette er mi nye favoritthistorie, seier Dervishi.

For Kvåle var det ergerleg då han mista alle bilda og videoane han hadde på kameraet, men historia fekk ein lukkeleg slutt.

– Det var jo heilt enormt kjekt å få dei att og eg er veldig takknemleg for at Janne la ned den innsatsen ho gjorde for å kopla kameraet og meg saman.

Alt som ikkje er stole eller brent, dukkar opp igjen, seier ordtaket.