Hasjgartnarar tatt på avsidesliggande gard

Sommaren 2020, medan Norge stort sett var opptekne av koronapandemien, skaffa to polske menn seg ein avsidesliggande gard på Indre Fosen i Trøndelag.

Etter kvart vart det ein god del aktivitet på garden. Men kanskje ikkje av den sorten ein først reknar med.

Det gjekk likevel nokre år før Tolletaten fatta mistanke om kva som gjekk føre seg ved Trondheimsfjorden.

Kjente lukta

Under ein observasjon hausten 2024, kjente dei derimot den umiskjennelege lukta, får TV 2 opplyst.

Då gjekk alarmen.

I slutten av november 2024 slo politiet til. Inne på garden fann dei heile 2000 cannabisplanter. Ein reknar at det kan gi nærare 130 kilo røykbart materiale.

Men påtalemakta meiner garden har produsert narkotikaen heilt sidan 2021.

– Men vi kan ikkje seie noko om det totale omfanget. Tiltalen handlar difor om den siste produksjonen hausten 2024, forklarar statsadvokat Per Morten Schjetne til TV 2.

Lukta var ikkje til å misforstå – dette fann politiet då dei slo til

Hasjgartnarar og smuglarar

Denne veka tok han ut tiltale mot heile seks menn. Alle frå Polen.

Påtalemakta meiner dei dreiv cannabisplantasjen og hadde ulike roller knytt til det.

Dei er alle tiltalt for narkotikaproduksjon og blir sett på som ein del av ei organisert kriminell gruppe. Det hevar strafferamma ytterlegare.

I tiltalen skriv påtalemakta kva roller dei meiner dei ulike tiltalte hadde:

Mann (48): Var med å kjøpa garden og står formelt som eigar av den. Deltok i oppbygginga, produksjonen og organiserte drifta av cannabisplantasjen.

Mann (37): Var med å kjøpa garden. Deltok i oppbygginga, produksjonen og organiserte drifta av cannabisplantasjen.

Mann (35): Deltok i oppbygginga, produksjonen og organiseringa av cannabisplantasjen.

Mann (49): La til rette for drifta og køyrde varer til og frå i forbindelse med oppbygginga. Skal også ha arbeida ved garden i ein periode. Mannen er også tiltalt for å ha smugla inn over tre millionar sigarettar nesten 20.000 liter brennevin til Norge.

Mann (24): Køyrde vogntog og frakta produksjonsutstyr til og frå garden.

Mann (33): Hausta cannabis på plantasjen ved å klippe blad og tørke toppskot og stenglar.

Mann (64): Hausta cannabis på plantasjen ved å klippe blad og tørke toppskot og stenglar.

«Cannabishuset» solgt: Så høy ble prisen

Allereie dømd

Alle, sett bort frå mannen som også er tiltalt for smugling av brennevin og sigarettar, har vore i varetekt sidan november 2024.

Dei sju tiltalte må møte i Trøndelag tingrett i desember. Tiltalen er også omtala av Adressa.

To av dei tiltalte nektar straffskuld og éin erkjenner delvis straffskuld, skriver avisa.

I sakskomplekset er ein åttande mann allereie dømd. Også han var hasjgartnar på garden. 

Han vart dømd til eitt år og seks månadar fengsel tidlegare i oktober, skriv Trønder-Avisa.