Her mista Hilde barnet sitt: – Kjipt at ho må i fengsel

Det var i fjor sommar at ei kvinne i 60-åra skulle ta av frå fylkesvegen utanfor Bodø i Nordland.

Avkøyrsla låg på andre sida av vegen og ho måtte difor krysse gulstripa for å ta av.

Men kvinna såg seg ikkje godt nok for før ho starta på svingen. I mot kom ein bil med to personar i. 

Sekund seinare smalt det.

Dømd til fengsel

Førre veke vart ho dømd til fengsel i 18 dagar.

Årsaka er at feilmanøveren hennar fekk fatale følgjer.

MISTA UFØDT BARN: Morkaka til Hilde (27) losna i ulukka. Det førte til at fosteret i livet hennar døydde. Foto: Run Gyllander Eide / TV 2

I bilen som kom imot sat nemleg Hilde (27), som var gravid i veke 19.

Kollisjonen førte til at morkaka losna. Fosteret døydde i hennar liv dagen etter.

TV 2 møtte Hilde tidlegare i sommar. Då fortalde ho om barndomsdraumen som blei knust.

Les saka her:

Barndomsdrømmen knust på ett sekund

Grua seg til retten

– Sidan dette var eit uhell, er det kjipt at ho må i fengsel. Kjenslene ho har bore på, har nok vore straff i seg sjølv. Samstundes er det godt at rettsapparatet fungerer, seier Hilde til TV 2 etter at dommen er klar.

Ho jobbar som miljøterapeut på ein barnevernsinstitusjon i Bodø, og kan difor ikkje stå fram med sitt fulle namn.

Hilde grua seg til rettssaka. Over eitt år etter ulukka møtte ho den tiltalte kvinna i rettssalen tidlegare i september.

– Det var fint å sjå henne. Ho angra på det som skjedde og fortalde at ho var veldig lei seg. Det var fælt å sjå kor tungt ho hadde det.

SATT I DENNE BILEN: Bilen som Hilde og arbeidskollegaen sat i, fekk omfattande skadar i fronten i kollisjonen. Foto: Avisa Nordland

– Oppriktig lei seg

I retten erkjente kvinna i 60-åra straffskuld.

Ho sa sjølv at ho hadde køyrd «tusen gangar» på same veg tidlegare.

Men ho hugsar ikkje kvifor ho ikkje forvissa seg om at det ikkje kom trafikk i mot før ho svinga av vegen.

Ho har i ettertid grubla på om ho kan ha blitt blenda av sola.

Det kjem fram i dommen at ho er «oppriktig lei seg for det som har skjedd og er klar på at det er hennar feil». 

– Det er ikkje teke stilling til om dommen skal ankast enno, seier forsvarar Svein Skipnes til TV 2.

Dommen vart omtalt av både Avisa Nordland og Bodø Nu i førre veke.

– Grovt regelbrot

Den no dømde kvinna fekk sjølv brot i ryggen og i ein legg.

– Tiltalte si merksemd har vore markant dårlegare enn det som objektivt sett blir kravd av ein bilførar før hen køyrer gjennom eit kryss med vikeplikt, skriv tingretten i dommen.

Dei omtalar regelbrotet som grovt. Kvinna er dømd for brot på paragraf 280 i straffelova, for aktlaust å ha valda skade på ein annan sin kropp eller helse.

Etter at Hilde (27) delte sin historie med TV 2 i sommar, har ho opplevd ein enorm støtte frå heile landet.

– Korleis går det med deg og sambuaren din no?

– Det går greitt med oss. Vi klarar å kome oss vidare. No er vi berre spent på om saka blir anka eller ikkje.