Kamelen i retten: – Eg blei provosert

Måndag møtte rappar Marcus Mosele, betre kjent som Kamelen, i Hordaland tingrett. 

Ikledd bøttehatt og matchande genser set han seg ned med advokaten sin. Han er ikkje interessert i å snakka med media før rettssaka. 

– Eg seier ingenting. 

Bergensartisten er tiltalt for å ha: 

• Køyrd i gjennomsnitt i 131 km/t i 80-sona. 
• Skjelt ut ein politimann som stansa han.
• Lagt ut bilete av politimannen på Instagram og bede om info om han.
• Klapsa ein ung mann i ansiktet på Strandkaien ein kveld i februar. 

Erkjenner delvis straffskuld 

– Om eg er skuldig? Delvis, sa Mosele. 

Han erkjenner delvis straffskuld på to av punkta; nemleg for å klapsa til ein ung mann på Strandkaien i Bergen, og for å ha kome med skjellsord mot ein politimann. 

Han seier seg ikkje skuldig i å ha køyrd for fort, eller å ha forulempa politiet sitt arbeid ved å legga ut bilete av ein politimann på sosiale medium. 

Forsvararen til Kamelen, Jørgen Riple, meiner fartsmålinga ikkje var til å lita på. 

– Det er ikkje mogleg å sei kvar målinga startar, sa Riple i opningsinnlegget. 

FORSVARAR: Advokat Jørgen Riple er Kamelen sin forsvarar. Foto: Kåre Breivik / TV 2

Kva gjeld utskjellinga av politimannen seier Riple at Kamelen truleg har sagt det, men at konteksten i forkant er viktig. 

– Dette blei sagt etter han blei lagt i bakken av politiet. 

–Blei provosert i forkant

Artisten erkjenner delvis straffskuld i episoden der han klapsar til ein ung mann. 

Han forklarer at han blei provosert i forkant av slaget då ein ung mann sprang ut i vegen framfor bilen hans. 

Mosele hadde då spurt om det gjekk bra med han, og skal ha fått «hald kjeft, din pakkis» i retur. 

Dette skal ha provosert Mosele, som sprang etter den fornærma og slått han i ansiktet. 

FORKLARING: Frå denne vitneboksen har Marcus Mosele forklart seg i retten i dag. Foto: Lidvard Sandven / TV 2

– Det var ein provokasjon i forkant. Viss han berre hadde sagt «hald kjeft» kunne eg ha stått i det. Det er det som kjem i etterkant som gjer at det blei som det blei, seier Mosele. 

Han har vedteke eit førelegg for denne hendinga. 

Den fornærma mannen seier han berre ropte «hald kjeft» til Kamelen. 

Sår tvil om målinga 

På punktet for å ha køyrd for fort meiner Kamelen at han ikkje køyrde i 131 slik politiet påstår, men rundt 100–110. 

Han har køyrd ein svart Lamborghini då han blei stoppa av politiet. 

– Du merkar kanskje ikkje at det går så fort i ein Lamborghini?, spør dommar Stein Dons Heinfjell. 

– Du merkar det. Eg såg på speedometeret. 

Kamelen blei stoppa av politiet etter fartsoverskridinga han er tiltalt for. 

Han meiner han blei provosert i forkant av utblåsinga han hadde mot politiet. 

I tillegg opplyser han at politimannen som stoppa han har stoppa han mange gonger før, og følte at politiet var ute etter å ta han. 

– Politimannen gnikkar seg inntil bilen med klokka og utstyr. Eg bad han fjerna handa fire-fem gongar, og då han ikkje gjorde det prøvde eg å fjerna handa hans, seier Kamelen. 

Politimannen forklarer i retten at han oppfatta Mosele som «sint som eit lemen», og at han opplevde som trugande då han tok tak i handa til politiet på veg ut av bilen. 

Etter han tok tak i handa hans blei fleire politikonstablar tilkalla, og Mosele blei lagt i bakken. 

Skjelte ut politiet

I etterkant skal Mosele ha kalla politimannen «soper», «fitte» og andre skjellsord. 

I etterkant tok han bilete av politimannen og bad følgarane på Instagram om informasjon. 

I retten seier Kamelen at han angrar på språkbruken. 

– Eg lirer av meg ting og tang eg ikkje er stolt over. Det blei som det blei, seier Kamelen. 

Under utspørjinga spurte aktor Silje Åsnes om han sjølv meinte han hadde kort lunte. 

– Nei, det vil eg ikkje sei, svarte han. 

Dommen er venta seinare i haust. 

PÅTALE: Aktor i saka er politiadvokat Silje Åsnes. Foto: Lidvard Sandven / TV 2

Dømt tidlegare 

Mosele har vore i rettsleg trøbbel tidlegare. I april i fjor blei han fråteke lappen, etter at politiet meinte han køyrde aktlaust. 

Han er òg dømt for vald og trugslar. Seinare i år skal han møta i Ringerike og Hallingdal tingrett. 

Her er han tiltala for kroppsskade etter han stagediva frå scenen i fjor vår. Ein publikummar enda opp med brot i nakken.