Louvre-direktør vil ha politistasjon på museet

Over hundre politifolk leitar etter tjuvane som stal smykke verd meir enn éin milliard kroner frå Louvre-museet i Paris i helga.

Innanriksminister Laurent Nunez seier etterforskinga «går framover».

– Eg er hundre prosent sikker på at vi vil finne dei skuldige, sa han onsdag.

Museumsdirektør Laurence des Cars måtte same dag i ei høyring i senatet for å svare for korleis tjuveriet kunne skje.

– Trass i vår innsats, trass i arbeidet vi gjorde kvar dag har vi blitt overvunne, sa ho.

Kamera peikte feil veg

Des Cars seier årsaka til at dei ikkje oppdaga tjuvane raskt nok var mangel på overvakingskamera på utsida av bygget.

Det var heller ikkje overvaking av balkongen kor gjerningsmennene, med hjelp av ei møbelkran og vinkelslipar, braut seg inn.

– Kameraa dekker tydelegvis ikkje alle fasadane på Louvre, og dessverre er det einaste kameraet som er installert på sida av Apollo-galleriet retta mot vest og dekker derfor ikkje balkongen som blei brukt i innbrotet, seier ho ifølge AFP.

Under høyringa foreslo des Cars betre overvaking og ein politistasjon inne på museet, skriv Reuters.

Det blei også klart at politiet blei varsla først fem minutt etter at tjuvane klatra inn balkongen. Dei var ute igjen med juvelane etter åtte minutt, skriv BBC.

Kan fikse krona

Dei stolne smykka har ein estimert verdi på 88 millionar euro, drygt ein milliard kroner, ifølgje den franske påtalemakta.

Tjuvane fekk likevel ikkje med seg alt dei ville ha. Ei historisk krone med diamantar og smaragdar vart funnen gata etter innbrotet. Korna var skada, men er mogleg å fikse, opplyser museumsdirektøren.

– Innleiande vurderingar tyder på at ei forsiktig restaurering er mogleg, seier des Cars.

Ho forklarte at krona ikkje vart skadd av fallet, men av at ranarane prøvde å trekkje henne ut gjennom ein for lita opning i det spesielle smykkeskapet.

Onsdag opna museet dørene igjen for første gong etter innbrotet.