1 week ago
14
Etterspurnaden etter løpesko aukar kraftig. Men må ein ha «supersko» for å springe raskare?
Publisert 23.04.2025 18:01
TV 2 møter Vår Åsheim (25) frå Gjerdrum etter ei intervalløkt på Voldsløkka, nord for Oslo sentrum.
Området er svært populært for løpeglade hovudstadsinnbyggjarar.
– Eg synest det er godt for hovudet. Det er eigentleg mest derfor eg spring. Det er deilig å kome seg ut, i alle fall når vêret er sånn her, seier Åsheim.
Ho har merka at stadig fleire verkar å ha begynt med springing.
– Det er berre å ta på seg sko og kome seg ut døra, liksom. Og så er det ganske sosialt, i alle fall no når det er så mange som driv med springing. Det er veldig lett å få med seg folk på turar, seier Åsheim.
Skoa ho har på seg, er om lag eit par år gamle.
– Dei kosta sikkert 2000 kroner. Så eg brukar pengar på sko, men meir enn det synest eg kanskje blir litt i meste laget.
TRENAR MOT LØP: – I julegåve fekk eg billett til Skyrace (eit løp i Lofoten) av søstra mi. Så då må eg nesten trene til det, seier Åsheim og ler. Foto: Sveinung Kyte / TV 2
SKO: Løpeskoa er om lag to år gamle. Dei er utan karbonsole, ifølgje Åsheim. – Det er jo digg å ha gode sko, men eg orkar ikkje å bruke så mykje pengar på det, seier ho. Foto: Sveinung Kyte / TV 2
Salet aukar
TV 2 skreiv nyleg at påmeldingane til gateløp har tatt av i år. I takt med dette, og at fleire verkar å ha kasta seg på løpebølga, har også salet av sko auka.
– Etterspurnaden etter løpesko har vore i kontinuerleg vekst, og utvalet av produkt har aldri vore større. Både store og små merke konkurrerer om å tilby sko som passar til alle behov og fotformer.
Det seier kategoridirektør for løpesko hos XXL, Frederic Mignotte.
Interessa har også flytta seg meir mot det Mignotte kallar «premiumprodukt».
– Sjølv dei dyraste løpeskoa er framleis relativt rimelege samanlikna med utstyr til andre idrettar, som ski eller sykling. Derfor ser vi ei aukande interesse for sko som kombinerer komfort, låg vekt og høg yting, seier Mignotte.
– Meir behageleg
Eit «premiumprodukt» som mange har investert i dei siste åra, er karbonsko. Dette er sko med ei karbonplate i sola.
Salet av karbonsko auka særleg frå 2022 til 2024, opplyser XXL til TV 2.
Tidlegare skiløpar og friidrettsutøvar Anders Aukland er ein del av NRK-podkasten «Skiklubben», som mellom anna gir treningstips til skigåing og springing. Han seier at skoa gir særleg to fordelar.
– Det eine er at du får litt hjelp til å bli løfta opp. Du får ein liten sprett i skoa, seier Aukland.
– Det er ei litt meir behageleg kjensle. Du får ein sånn snert i steget, legg han til.
Den andre fordelen er at ein lettare kan unngå skadar, fortel Aukland. Han viser til at løpeskoa han brukte då han dreiv med springing før, gjorde at ein blei veldig støl i leggane.
– I dei nye karbonskoa får ein den raske «snert-effekten», utan å bli så belasta i beina, seier Aukland.
Han synest det utviklinga i tilbodet av løpesko er positiv.
– Det har aldri vore noko kostnad i å drive med springing. Du kunne klart deg med sko til 1000 kroner. Men no har skoa utvikla seg litt og blitt litt dyrare. Det synest eg er heilt greitt. Viss du blir inspirert av det og får lyst til å kjøpe dei, så er det framleis ei lita utgift i forhold til mange andre idrettar, seier Aukland.
– Så synest eg òg absolutt at det ikkje er nødvendig. Eg har mange sko frå gamle dagar som eg også spring med, seier han.
MARATON: Marco Parma (69) var 53 år då han byrja å springe. Fire år seinare sprang han New York Marathon med ein kamerat. – Det gir meg ei god kjensle når det har gått 10-12 kilometer og ein føler ein kan springe «for alltid». Foto: Sveinung Kyte / TV 2
SKO: – Desse er vanlege, men eg brukar karbonsko i løp, seier Parma. Han synest karbonskoa er lettare og har betre demping. – For meg trur eg ikkje det er nokon fartsfordel, men det er ei deilig kjensle at dei veg mindre, seier han. Foto: Sveinung Kyte / TV 2
MÅL: No trenar han til Sentrumsløpet i Oslo og maraton i Sydney i august. – Det er fint å ha eit mål framfor seg, seier Parma. Foto: Eira Kråbøl / TV 2
– Men det er betre med nye sko, avsluttar Aukland.
– Kunne klart seg med ein enklare modell
Tor Fauske, som er dagleg leiar for Löplabbet i Noreg, har ei litt anna oppfatning.
– Eg trur det er mange som kjøper karbonplatesko, som kostar 3000 kroner eller meir, men som kunne klart seg fint med ein enklare modell. Det seljast nok i overkant mange av dei, seier han.
Löplabbet-sjefen har sett salet eksplodere dei siste åra. Det starta under pandemien, men særleg sidan 2023 har salet tatt av.
I 2024 hadde kjeda ein salsvekst på nesten 50 prosent på løpesko. I første kvartal i 2025 var veksten på 70 prosent samanlikna med same periode i fjor, men det kan ha noko med den snøfattige vinteren i år, peiker Fauske på.
VOLDSLØKKA: Øyvind Karlsen (35) og Kim Blichfeldt (34) frå Nesodden trenar mot fleire løp i sommar. – Vi har nokre årlege konkurransar som er gøy å prøve å perse på, seier dei. Foto: Eira Kråbøl / TV 2
KARBONSKO: Blichfeldt skal snart springe halvmaraton, og har derfor på «konkurranseskoa» på trening denne dagen, som har karbonsole. – Vi begynte å teste karbonsko for to-tre år sidan, seier Karlsen. Foto: Sveinung Kyte / TV 2
– Noreg er litt spesielt i forhold til andre land og marknadar. Her er vi tidleg på trendar og vi har ganske god råd, som gjer at vi har råd til sko, seier han.
Veksten gjeld både sko med og utan karbon.
– Vi sel bra med begge delar, men viss du tar konkurransesko med karbonplate, også kalla supersko, så er Noreg heilt spesielt fordi mange kjøper fleire par av dei. Det er ingen stader i verda du ser så mange som er ute og joggar med supersko. I andre marknadar sparer dei på desse skoa til konkurranse.
Ikkje for alle
«Superskoa» er likevel ikkje for alle, meiner han.
– Eg vil anbefale ein fersk løpar å velje ein sko som er mest mogleg «old school», som er med å styrke foten, beina og muskulaturen, for å trene opp styrken du treng for å springe skadefritt, seier Fauske.
– Karbonplate- og superskoa er for dei som definerer seg som seriøse løparar, som trenar aktivt for å prestere betre. Då bør det vere løparar som er på eit nivå under 40 minutt på mila og helst under 3 timar på maraton, seier Fauske.
Om ein spring saktare enn dette er det litt som «å kaste perler for svin», meiner han.
– Har du pengane er det heilt flott, men å springe maraton på fire timar kan du fint gjere i mange andre typar sko som er mykje meir skånsomme og gjer at du kjem lettare gjennom distansen, seier Fauske.
– Skal ha ein viss fart
Löplabbet-sjefen peiker igjen på at ein må opp i ei viss fart for å få fullt utbytte av eit par karbonsko.
– Karbonplata er med å skape eit moment som gjer at du skyver meir kraftfullt frå, men viss du spring på fem-seks minutt på kilometeren, så er ikkje teknikken sånn at skoa gir det beste skyvet. Du skal ha ein viss fart og eit visst trykk i skoa for å få igjen det skoa er laga for, seier han.
Ofte kjem det folk i butikken hans for å kjøpe ein karbonsko, som heller burde investere i andre sko, ifølgje Fauske.
– Når vi høyrer at dei skal springe på ei viss tid kan vi seie at ein supersko ikkje er det beste, og så prøver vi å guide dei til ein sko som er snillare og kanskje til og med litt billigare, seier han.
English (US)