Matilde (26) har fleire følgarar enn alle toppklubbar: – Tenker på at heile verda følger med

– Han er nesten på nivå med italiensk is.

Den ferske Vålerenga-spelaren Matilde Lundorf Skovsen nyt eit lite stykke Italia i Oslo.

26-åringen har fotballfortid i storbyane Paris, Milano og seinast i Napoli, der ho har bygd seg opp ein stor følgarskare i sosiale medium.

Nå følger ho i spora til bestevenninna Janni Thomsen og skal finne seg til rette i Vålerenga og den norske hovudstaden.

– Eg har sett fram til å komme hit, fordi eg kan skape ein base her. Eg kjenner meg meir heime her enn eg har gjort tidlegare.

Men ni år etter at ho flytta til utlandet for å følge draumen, er det eit sakn frå barndommen som motiverer henne.

– Vanskeleg å leve livet eg lever

– Det er utruleg viktig med kvinnelege forbilde. Då eg var liten, hadde eg ingen å sjå opp til. Då eg voks opp, var eg ikkje klar over at det fanst eit kvinneleg landslag.

Dansken måtte trakke sin eigen sti i den danske storbyen Århus då ho voks opp med å dyrke lidenskapen sin, ettersom ho ikkje hadde nokon kvinnelege fotballforbilde å sjå opp til.

Etter det grensesprengande EM-sluttspelet i sommar i Sveits, som sette ny publikumsrekord med over 650.000 tilskodarar og 500 millionar TV-sjåarar globalt, har unge jenter nå større høve til å vekse opp med kvinnelege fotballforbilde.

Den norske landslagsstjerna Ingrid Syrstad Engen har vore tydeleg på at ho ønsker å bruke bildedelingstenesta Instagram aktivt, slik at yngre jenter kan vekse opp med kvinnelege forbilde.

Lundorf Skovsen, som var den einaste jenta som spelte fotball aktivt og i friminutta med gutane på skulen, deler den oppfatninga.

– Eg ønsker å vere ein inspirasjon for små jenter, og vise dei at jenter også kan spele fotball, seier ho.

– Jenter som spelar fotball, kan godt også vere feminine. Ein treng ikkje å sjå ut på ein viss måte eller berre ha fotball i livet for å vere fotballspelar.

Samtidig kjem med ho ei innrømming:

– Eg er ikkje så flink til å vise alt frå fotballverda. Eg synest det er vanskeleg å leve det livet eg lever. Instagram er meir det perfekte livet. Så eg publiserer jo bilde når vi vinn, har det gøy eller opplever nokre sinnssjuke ting. Eg legg sjeldan ut innlegg der eg er utsliten etter trening.

– Fordi det ikkje passar på din Instagram?

– Eg kjenner ikkje at Instagram er ei plattform for meg kor eg ønsker at alle skal følge med i livet mitt. Eg er ein veldig privat person, sjølv om eg har mange følgarar.

Forsvarsspelaren liker å «ta flotte bilde og oppleve ting» og ser på Instagram som ein hobby for å dele fine stadar, fotballopplevingar og mote.

– Herregud, så merkeleg

Med over 120.000 følgarar på Instagram har forsvarsspelaren fleire følgarar enn alle toppklubbar på både kvinne- og herresida i Noreg, og ho har fleire følgarar enn alle Toppserien-klubbane til saman.

– Oh my god. Det er merkeleg, bryt den tidlegare Juventus-spelaren ut når ho får høyre tala og blir nesten brydd.

– For eg ser ikkje på meg sjølv om ein influensar. Eg spelar berre fotball.

Etter at 26-åringen tok sitt tredje strake seriegull med Juventus, la ho ut eit innlegg, og då ho vakna neste morgon hadde ho fått over 100.000 nye følgarar på Instagram.

– Følgarane gir sjølvsagt eit ansvar. Eg kan ikkje berre legge ut kva eg vil. Så eg tenker på at heile verda følger med.

– Men du ønsker å inspirere yngre jenter?

– Sjølvsagt. Fotball er ein veldig maskulin sport, men du treng ikkje å vere maskulin som person. På den måten trur eg at eg er eit forbilde og inspirerer andre, men eg er privat. Så eg legg ikkje ut alt mogleg og tar videoar av kvardagen min.

Vil tilbake på landslaget

Sidan 2019 har ho delt innblikk som spelar for Brighton, Juventus, HB Køge, Como og Napoli. Nå byter ho ut den italienske kvardagen til fordel for Noreg etter overgangen til serieleiar Vålerenga.

– Eg gler meg til å møte folk på stadion og snakke med dei unge jentene. Eg synest det er viktig at ein ikkje berre er ein person på banen eller på Instagram, men eg vil vere den ekte personen som møter folk og snakkar med dei.

– Systemet i Vålerenga passar verkeleg godt for meg, for landslaget spelar på same måte med trebackslinje. Den posisjonen eg kjem til å spele i her, er den same posisjonen som landslagstrenarane ønsker.

Den raske forsvarsspelaren har spelt to A-landskampar, men har ikkje vore med i den danske landslagstroppen sidan 2022

– Draumen min er å komme tilbake på landslaget. For min del er det å representere landet noko av det største eg kan oppnå, det å få høve til å ta på meg landslagsdrakta.

Nå ønsker ho å føye seg i rekka av danske spelarar som har lykkast i den kongeblå drakta.

Dei tidlegare Vålerenga-spelarane Stine Ballisager Pedersen og Janni Thomsen, som begge var ein del av den danske EM-troppen i sommar, tok steget vidare i karrieren etter nokre sesongar i Vålerenga.

Lundorf Skovsen forhøyrde seg med bestevenninna Thomsen framfor signeringa.

– Vålerenga er ein kjempegod klubb og ein vinnarklubb, men det er også eit kjempebra springbrett for å komme enda større stader i karrieren. Eg trur at ein ikkje er ein ordentleg profesjonell utøvar om ein ikkje jaktar noko som er betre og større.