Måtte stengast på dagen – no er vegen kåra til Noregs verste

2 weeks ago 13

– Vi veit at vegen er skikkeleg dårleg, og vi har jobba lenge for å prøve å rette den opp og få nokre konkrete planar på bordet, seier Linda Gulbrandsen.

Ho bur i Feiring i Eidsvoll kommune. Den einaste vegen inn og ut av bygda, fylkesveg 33, er smal, svingete og utsett for ras.

Stengte på dagen

27. august måtte vegen stengast ved Byrud mellom Minnesund og Feiring. Vegen var stengt i seks dagar.

Årsaka var at ein fjellvegg tett inntil vegen hadde bevegd seg. Fylkeskommunen ønskte derfor å ta ned fjellveggen før dei kunne opne vegen igjen.

Medan vegen blei stengt, sette lokale eldsjeler opp båtsamband over Mjøsa så innbyggjarane kunne kome seg inn og ut av bygda.

I same periode har Opplysningsrådet for vegtrafikken (OFV) hatt ei kåring om kva som er Noregs verste fylkesveg.

Denne tittelen er det no vegen forbi Feiring som har fått. Fv. 33 blei stemt fram som «Noregs verste fylkesveg».

– Det er ikkje så rart, men det er jo ikkje akkurat noka ære å få den, seier Gulbrandsen om tittelen.

Ho er leiar for «Feiringregjeringa», som jobbar med utvikling av bygda.

– Vi ventar eigentleg berre på at heile greia skal rase ut, for den er dårleg både på undersida og oversida, seier ho.

Omkøyring for E6

Vegen blir også nytta som omkøyringsrute av mange dersom E6 er stengt på austsida av Mjøsa.

Dette var eitt av argumenta til at fv. 33 blei trekt ut som ein av ti fylkesvegar som kunne bli Noregs verste, fortel Torill Eidsheim, som er leiar for samfunnskontakt og mobilitet i OFV.

– Delar av strekket er smalt og rasutsett. Det er stupbratt ned i Mjøsa på nedsida, og det er vanskeleg for bilar å kome forbi kvarandre, seier Eidsheim.

– Det er alternativ omkøyringsrute for E6, og det er ein lokalveg som er viktig for folk i kvardagen. I tillegg er næringstransport avhengig av den, legg ho til.

Eidsheim meiner vegen er eit symbol på ei problemstilling som gjeld mange stader, ettersom det er behov for kostbare investeringar på vegen.

I tillegg trekk ho fram at prosjektet blir langt dyrare enn planlagt fordi alunskiferen i fjellet må handterast på ein særeigen måte.

Kåring av Noregs verste fylkesveg

I september blei ti vegar trekt fram som Noregs ti verste fylkesvegar av ein jury.

Etter dette kunne folk stemme fram ein vinnar. Over 8000 stemmer kom inn.

Dei ti finalistane var:

Akershus – Fv. 33 Feiring
Østfold – Fv. 1178 Gunnarstorp – Karlsøy
Innlandet – Fv. 2434 Vest-Torprunden
Innlandet – Fv. 2158 Valmen – Sjøenden
Vestland – Fv. 49 Steinsdalen – Eikedalen
Vestland – Fv. 615 Storebru – Sandane
Trøndelag – Fv. 776 Hofles – Romstad
Trøndelag/Nordland – Fv. 17 Kystriksveien Asp – Lødingen
Troms – Fv. 7768 Tromvik – Henriksvik
Finnmark – Fv. 8850 Hesseng–Nyrud

Stort forfall

Fylkesvegen ved Mjøsa er ikkje den einaste med dårleg standard.

Ei utrekning som NAF offentleggjorde i august viser at kostnadane for å ta igjen forfallet på fylkesvegane vil auke frå 108 milliardar i dag til 119 og 131 milliardar om fem og ti år, dersom ikkje løyvingane blir auka.

Summen inkluderer ikkje rassikring eller utviding av vegane.

I tillegg har om lag 4 av 10 fylkesvegar dårleg dekke, ifølge ein rapport frå OFV.

Har ikkje pengar

Det har vore planlagt tunnel gjennom området som no er stengt i lang tid.

Feiringminister Gulbrandsen meiner at fylket må prioritere tunnelen, og viser til at vegen nyttast som omkøyringsveg for E6.

– Bygdas befolkning treng ein sikker veg for å kome seg til vidaregåande skular, jobb, for å få helsetilbod, og meir, seier Gulbrandsen.

Men om det kjem ny veg, er usikkert.

Då det blei sett i gang eit forprosjekt for nokre år sidan, blei det nemleg funne alunskifer i fjellet. Fjerning og handtering av alunskifer kan føre til store ekstrakostnadar.

Prosjektet ligg dermed an til å koste om lag ein milliard kroner.

– Tunnelprosjektet vi skulle ønske vi kunne drive i det rasutsette området, har blitt så dyrt at verken fylkeskommunen eller bilistane, i form av bompengar, kjem til å ha råd til å finansiere prosjektet, sa fylkesråd for samferdsel i Akershus, Håkon Snortheim (H) til TV 2 i august.

Tysdag deltok Snortheim på eit folkemøte i Feiring for å svare på spørsmål om strekninga.

Prisen som Noregs verste fylkesveg meiner han er fortent.

– Det er ein fortent siger. Vi er veldig godt klar over at standarden ikkje er god nok, seier han.

Snortheim viser til at fylket jobbar med fleire prosjekt på fv. 33, som ny gang- og sykkelveg, skredsikring og tunnel mellom Feiring og Skreia.

Men han kan ikkje love ny tunnel på plassen som brått måtte stengast i august, mellom Minnesund og Feiring.

– Vi har ein ekstremt krevjande økonomi, og dei fleste samferdselsmidlane vi brukar er anten frå bomringen rundt Oslo eller statlege belønningsmidlar. Dei midlane kjem med føresetnad om at dei må brukast på gang og sykkelveg eller kollektivtrafikk, seier Snortheim til TV 2 og legg til.

– Det gjer at vi har lite midlar å bruke på reine vegprosjekt dessverre. Så gjer vi det vi kan for at trykket kan haldast oppe på fylkesveg 33. Derfor gjer vi dei grepa vi kan neste år og i åra som kjem, men vi er ikkje ferdig, seier Snortheim.

Read Entire Article