Republikanarar klagar til Canada over røyk frå skogbrannar

Canada er inne i sin nest verste skogbrannsesong nokosinne. Det skriv The Working Forest.

Så langt er nesten 50.000 km² tatt av flammane, melder CIFFC.

Det svarer til eit område nesten på størrelse med Innlandet fylke.

Røykspreiing

Resultatet av brannane er at røyk har spreidd seg over enorme område.

I juni viste satellittbilde at røyk hadde spreidd seg over Atlanterhavet og til Europa.

I delar av Frankrike var røyken så merkbar at han førte til dårlegare sikt.

Store delar av det nordlege USA merka røyken. Både i mai og juni blei det sendt ut åtvaringar til innbyggarane i delstatane Michigan, Wisconsin; Nebraska og Minnesota.

Sende brev til ambassaden

Denne veka har seks medlemmer av Representanthuset klaga til Canada.

Dei seks er Republikanere frå delstatane Wisconsin og Minnesota. Begge ligg nord i USA og nær nokre av områda i Canada med mange brannar.

I eit brev til den canadiske ambassadøren til USA skriv dei blant anna:

«Veljarane våre har fått avgrensa høva sine til å vere utandørs og puste trygt på grunn av den farlege luftkvaliteten som følger av brannane.»

«I våre område er sommarmånadene den beste tida å vere utandørs, nyte friluftsliv saman med familien og skape nye minne, men røyken frå brannane gjer dette vanskeleg.»

Dei seks krev nå at Canada tar grep for å avgrense brannane og den skadelege røyken.

«Med all teknologien som vi har tilgjengeleg, både for å forhindre og nedkjempe skogbrannar, kan denne trenden snuast om ein tar dei rette grepa».

Sjå heile brevet nedst i saka.

Sterke reaksjonar

Brevet har vekt sterke reaksjonar i Canada, skriv BBC. Statsministeren i delstaten Manitoba, Wab Kinew, seier at brevet er eit forsøk på å bagatellisere ein livsfarleg situasjon.

Manitoba måtte denne veka erklære unntakstilstand for andre gong denne sommaren.

Michael Waddington er professor ved McMaster-universitetet i Hamilton, Ontario. Han studerer skogbrannar og seier til New York Times at eit varmare klima gjer kanadiske område til ei kruttønne.

– USA er hovudgrunnen til det, seier Waddington og viser til USAs historiske rolle når det gjeld utslepp av klimagassar.

Har blitt verre

Dei tre siste åra er dei verste brannårene i Canada sidan år 2000.

2023 var ein marerittsommar. Da blei eit område større enn halve Noreg tatt av flammane i Canada. Det var meir enn dobbelt så mykje som noko tidlegare år.

• Les også: 2023-brannane i Canada sprengde skalaen

2024 var det nest verste sidan år 2000. Sommaren i år er allereie nesten like ille som heile fjoråret, sjølv om det ennå er første halvdel av juli.