Slår alarm om menneskeretts­brot – innsette isolert opptil 22 timar i døgnet

Konklusjonen er tydeleg: Myndigheitene har ikkje klart å redusera isolasjonen av innsette, trass tidlegare åtvaringar.

– Me er uroa over at stadig fleire ser ut til å bli innelåste på cella nesten heile døgnet, seier sivilombod Hanne Harlem.

– Aldri vore verre

Tysdag overleverte Sivilombodet ei særskilt melding til Stortinget, basert på besøk i ti høgsikkerheitsfengsel i 2023 og 2024.

NRK var med på eit av dei umelde besøka i fjor haust. Alt då uttalte Sivilombodet at forholda i norske fengsel aldri har vore verre.

Besøksrunden viser at utfordringane med innlåsing og isolasjon av innsette framleis er svært alvorlege.

Funn frå rapporten viser at:

• Mange innsette bruker mindre enn åtte timar utanfor cella dagleg.
• Fleire blir sittande isolert i 19–22 timar i døgnet utan at det er grunna åtferd eller vedtak.
• Enkelte er innelåst meir enn 22 timar i døgnet.
• Hovudårsakene er mangel på tilsette, dårlege bygningsforhold og stramme budsjett.

Sivilombodet meiner situasjonen er i ferd med å forverra seg og åtvarar om at omfattande innlåsing kan føra til brot på menneskerettane.

– Urovekkande

I 2019 varsla Sivilombodet Stortinget om dei helseskadelege forholda og isolasjon i norske fengsel. No slår dei fast at situasjonen er blitt verre.

– Det er gjort tiltak etter våre anbefalingar i 2019, men det er urovekkande at forholda rundt isolasjon ser ut til å ha forverra seg etter at me varsla, poengterer Harlem.

Rapporten peikar også på at fleire innsette har dårlegare helse enn før, med auka rus- og psykiske lidingar.

Fengsla melder om fleire med krevjande åtferd, noko som gjer det vanskeleg å ta vare på sårbare innsette og hindra vald og konfliktar.

– Innsette som allereie slit, blir enda dårlegare av isolasjon. Dette må takast på alvor, seier Harlem.

Sivilombodet etterlyser umiddelbare tiltak for å sikra at innsette får minst åtte timar ute av cella kvar dag – slik internasjonale standardar krev.

Internasjonal kritikk mot norske fengsel

I januar fekk Noreg hard kritikk frå Europarådets torturkomité (CPT) for soningsforholda. Også her blei omfattande isolasjon trekt fram som eit alvorleg problem.

– Me må følgje opp denne rapporten grundig, seier statssekretær Even Eriksen (Ap) i Justis- og beredskapsdepartementet.

Europarådets komite mot tortur anbefaler at tilsette brukar minst åtte timar utanfor cellene kvar dag.

Men i alle fengsla Sivilombodet besøkte i 2023–2024 var det éin eller fleire fellesskapsavdelingar der alle innsette utan eit dagtilbod blei låst inne i minst 17 timar i døgnet. I helgene var det i mange tilfelle endå verre.

Desse forholda krev umiddelbar handling, meiner Sivilombodet.

– Det er behov for gjennomgripande tiltak, seier Harlem.