Snorre hyllar Helse-Noreg etter sjølvmordstankar

13 hours ago 2

– Da eg var der var eg ekstremt takknemleg for at det siste eg trengte å tenka på var om eg skulle få full lønn, seier Snorre Rein.

På TV 2 sitt nye debattprogram «Versus» fortalde han om kampen hans mot sjølvmordstankar, og korleis behandlinga han fekk gjorde han takksam for velferdsstaten.

– Gjorde at eg kunne bli frisk

Snorre Rein er samfunnsdebattant, og har skote fart på sosiale medium den siste tida, der han har markert seg som sjølvutnemnd «fagforeiningsinfluenser».

Han legg ofte fram synspunkt frå venstresida, og har gått i strupen på mellom anna Gyda Oddekalv og «Gutta».

På «Versus» debatterte han blant andre medlem av Liberalistisk Ungdom, Benjamin Bringsås.

Påstanden var «norske myndigheiter sløser bort skattepengane våre».

Rein stilte seg på ueinig-sidan av påstanden, og grunngav det med at mesteparten av statsbudsjettet går til skole, helse, forsvar og politi.

– På same måte visste eg at dei velferdstenestene eg brukte, måtte eg ikkje betale for. Så eg slapp å tenke på det. Det gjorde at eg kunne bli frisk. Det gjorde seinare at eg også kunne bli ein bidragsytar til Noreg igjen, seier Rein om tida han var sjukemeld.

Han er ikkje åleine om sjølvmordstankar.

4 av 10 menn mellom 16 og 36 har hatt sjølvmordstankar, viser tal frå rapporten «Status Ung 2024», som er utført for Mental Helse Ungdom.

I snitt dør rundt 700 personar av sjølvmord i Noreg kvart år. Dei fleste er menn.

– Eg har snakka med så mange menneske etter at eg delte min første sak, og det er jævlig viktig at det bodskapet når ut særleg til unge menn, som er veldig utsett for desse plagene, seier Rein til TV 2 ei stund etter debatten.

Han meiner det er viktig å opna opp om psykisk helse.

– Samfunnet har ikkje lagt opp til at det er heilt innanfor endå å vera heilt open om det. Det er framleis mykje skam, sjølv om me snakkar om at det er viktig å vera open om psykisk helse.

25-åringen seier han valgde å nemna problema han har hatt med sjølvmordstankar i debatten om skatt fordi han meiner denne valkampen handlar om ein skal bygga meir fellesskap, eller gå over til ein modell der me i større i grad ansvarleggjer enkeltpersonar.

Rein meiner at me i framtida treng ein sterk velferdsstat, og at ein då må ha folk med høg skattevilje.

– Frekt

Rein deltok i tredje og siste episode av «Versus», der skatt var tema.

Det at myndigheitene sløser var ein av påstandane. Dei to andre handla om at ein betalar for mykje i skatt, og om skatteflyktningar var unnasluntrarar.

Spesielt i debatten om skatteflyktningar blei det fyr i teltet.

Kanskje ikkje overraskande dreia debatten fort over i ein diskusjon om formuesskatten.

– Eg syns det er frekt at når ein har fått alle desse goda av velferdsstaten, så er ein så frekk at ein grin i norske aviser og flyttar ut av landet fordi ein må betala ein brøkdel av eigen formue i skatt, sa Frøya Sjursæther, som er førstekandidat for Hordaland MDG.

Ein betaler formuesskatt til både staten og til kommunen.

Til kommunen betalar ein 0,525 prosent av formue over 1 760 000 kroner. Til staten betalar ein 0,475 prosent viss ein har mellom 1,760 001 kroner og 20 700 000 kroner i formue.

Har ein over dette er satsen på 0,575 prosent.

Både Høgre, Framstegspartiet, Kristeleg Folkeparti og Venstre har tatt til orde for å enten fjerna eller redusera formuesskatten.

Mellom anna er det fordi dei meiner den urettferdig råkar norske eigarar, då utanlandske bedrifter ikkje betalar formuesskatt i Noreg.

Simen Velle var ein av dei.

– Dei som har flytta til Sveits, er ein av dei største skattebetalarane i Noreg. Dei som betalar for skuleplassane og det trygge sikkerheitsnettverket som me er så stolte over å representera, sa Velle.