Statsforvaltaren har ikkje vurdert sykkelparkering for Ikea

Ikea har planlagt nytt varehus med lager ved Solasplitten på Forus i Stavanger. Foto: Illustrasjon: Ikea

Forus har fastsett ei parkeringsnorm for bilar.

Aftenposten skriv 19. mars om at Ikea ikkje får dispensasjon for å etablere fleire parkeringsplassar for bil. Stavanger Aftenblad omtala saka først, under ei misvisande overskrift.

Denne saka handlar ikkje om sykkelparkering. Ho handlar om at Kommunal- og distriktsdepartementet i Interkommunal delplan for Forus har fastsett ei parkeringsnorm for bilar, som er bindande for kommunane i området.

Kommunen kan ikkje bryte norma utan å gå vegen om å endre reguleringsplanen. Plan- og bygningslova er tydeleg på at dispensasjon ikkje kan nyttast til å setje vesentleg til side regelen det blir dispensert frå, i dette tilfellet parkeringsnorma. Det veit alle som driv planarbeid.

Parkeringsnorma har støtte i Byvekstavtalen for Nord-Jæren, der staten har lagt inn over 1,6 milliardar kroner og kommunane har slutta seg til. Krava til sykkelparkering pr. kvadratmeter bygg følgjer av den interkommunale delplanen for Forus og er ikkje vurdert i vedtaket vårt.