Støre tar avstand frå Nato-sjefen si smiske-melding

Verdsleiarane var travle med å sjarmere Trump før og under toppmøtet i Haag.

Ei melding frå Nato-sjefen Mark Rutte har vekt merksemd.

Like før Trump kom til toppmøtet, skreiv Rutte ei privat melding på til den amerikanske presidenten.

Mark Rutte:Gratulerer og takk for den avgjerande handlinga di i Iran, det var verkeleg ekstraordinært og noko ingen andre våga å gjere. Det gjer oss alle tryggare.

Les heile meldinga nedst i saka.

– Det han skreiv får stå for han si rekning. Eg har ikkje uttrykt meg sånn.

Det seier statsminister Jonas Gahr Støre til NRK.

Dårleg strategi

Statsministeren er tydeleg på at han ikkje trur smisking er vegen å gå.

– Eg er mot å smiske med folk. Eg trur det er ein dårleg strategi, seier statsminister Jonas Gahr Støre.

– Men vi skal snakke med folk slik at dei lyttar til oss.

Men også statsministeren har blitt kritisert for å smiske med den amerikanske presidenten.

I april møtte Støre presidenten i Det ovale kontor.

Her delte Trump om sin beundring for kong Harald, og Støre ønska presidenten velkommen til Noreg.

Under møtet skrytte Støre av presidenten sitt forsøk på å skape fred i Ukraina. Han tok ikkje opp tematikkar kring krigen som Støre og Trump er ueinige om.

Støre meiner at han ikkje smiska.

– Å ikkje ta opp det vi er ueinige om er ikkje ei form for smisking, seier Støre.

Roser Trump

Ifølge Støre har Rutte si melding til Trump fått mange kommentarar.

– Han fekk nok ganske mange kommentarar frå meg og andre i Nato på det. Det var ei privat melding som Trump la ut for heile verda.

På Nato-toppmøtet heldt Rutte fram med å rose Trump.

Nato-sjefen sa at USA har fjerna atomkapasiteten til Iran etter angrepet mot tre atomanlegg i landet.

– Det er veldig imponerande, sa Rutte i ein pressekonferanse.

– Det viser at den amerikanske presidenten kan bruke makt om nødvendig. Det er eit viktig signal til resten av verda.

Trump har tidlegare fått ros frå EU-sjef Ursula von der Leyen, som ønskte Trump sitt arbeid med ei våpenkvile mellom Iran og Israel, velkommen.

Før toppmøtet fekk Støre spørsmål om smisketendensane før møtet.

– Eg meiner vi må handtere ting mann til kvinne, kvinne til kvinne, kvinne til mann. Vi må vere allierte. Vi behandlar våre allierte som nære venner og partnarar.

Dette var meldinga frå Mark Rutte til Trump:

Mark Rutte:Herr president, kjære Donald,

Gratulerer og takk for den avgjerande handlinga di i Iran, det var verkeleg ekstraordinært og noko ingen andre våga å gjere. Det gjer oss alle tryggare.

Du flyg mot ein annan stor suksess i Haag i kveld. Det var ikkje lett, men vi har fått dei alle til å skrive under på 5 prosent!

Donald, du har ført oss til ein verkeleg, verkeleg viktig augeblink for Amerika og Europa, og verda. Du vil oppnå noko INGEN amerikansk president på fleire tiår har klart før.

Europa kjem til å betale mykje, slik dei burde, og det vil vere din siger.

God tur og vi sjåast på middag hos Hans Majestet!

Interessert i meir frå utanriks? Høyr podkasten vår her: