Trenden eksploderer: 19-åring får æra

– Eg blir aldri lei – ofte står eg opptil fire timar og berre kastar, kastar og kastar, seier 16 år gamle Linus Gravdal.

Han er i Norgestoppen i ein svært nisjeprega idrett.

Men eigentleg er det ikkje så nisje lengre.

For dart har aldri vore meir populært. Faktisk har det tatt heilt av.

– Eg kunne aldri sett for meg at det kunne ta av på den måten, seier Noregs dartpresident, Mona-Lisa Brodin.

Enorm auke

Ifølge Brodin, har talet på medlemmer i Dartforbundet auka med 30 prosent på under eitt år.

Enkelte dartklubbar opplever dobbel auke i talet på medlemmer. I tillegg blir det oppretta nye i rekordfart, fortel dartpresidenten.

– Eg har kompisar som har prøvd dart, og så har dei berre blitt heilt hekta, seier Gravdal.

Det er ikkje berre i Noreg det er dart-feber:

Over 5 millionar menneske såg fjorårsfinalen i verdsmeisterskapen i dart. Det var nesten tre gonger fleire enn året før.

I 2024 blei talet på ungdommar som driv med dart i England dobla. Eitt år seinare er talet firedobla igjen.

Rart at ein engelsk pub-sport kan bli så populær for unge menneske over heile verda, tenker du kanskje?

Vel, noko av æra skal ein 19-åring frå England ha.

Dartens Petter Northug

Luke Littler var idrettsutøvaren som blei googla flest gonger i 2024.

Tittelen verdsmeister, som han fekk i ein alder av 17 år, gjorde han verdskjent over natta.

Han blei såpass populær at han fekk sitt eige omgrep: «The Luke Littler-effekt».

Kanskje er han, dersom det kan samanliknast, dartens Petter Northug: sjølvsikker, humoristisk, ekstremt god – og ikkje minst: gjer sporten mykje meir populær.

Svimlande pengesummar

Gravdal, det norske dart-talentet, viser likevel ikkje full begeistring for engelskmannen.

– Eg synest han er litt usympatisk, seier Gravdal lattermildt og utdjupar:

– Men det er heilt garantert at fleire unge er interesserte i dart på grunn av Littler. Han er eit forbilde for mange.

Kombinasjonen av provoserande stil og resultat i særklasse, har inspirert ein ny generasjon dartspelarar.

– Eg har lyst til å bli best – aller best, seier den 16 år gamle noregsmeisteren.

Målet er verdsmeisterskap i dart – som fleire titusen reiser for å sjå med eigne auge.

Pengepotten for førsteplassen? Nesten 14 (!) millionar kroner – ei dobling frå året før.

– Det er artig at dart endeleg blir sett på som noko anna enn berre ein fyllesport, seier den norske juniorlandslagstrenaren, Peter Rundqvist.

Slagmark, pub og overfylte arenaer

Dart oppstod truleg i England på 1300-talet. Soldatar som kjeda seg i skyttargravene kasta avsaga pilspissar mot botnen av vinfat og tømmerstokkar.

Seinare blir det adaptert av overklassen og vidare innført i den britiske pub-kulturen.

Sjølv om dart har fleire sjåarar og spelarar enn nokon gong, lever framleis dart-puben – og så til dei grader.

– Ein blir jo jævlig sint når ein taper, så da er det berre å ta seg ein tur til i baren, forklarer svenske Daniel Gran, som speler dart i ein proppfull bar i Oslo sentrum.

Berre i hovudstaden er det godt over ti barar som spesialiserer seg på å gi eit dart-tilbod.

– Eg merkar at det har blitt meir populært – berre på jobb blir det snakka mykje meir om, fortel Gran.

Det 16 år gamle dart-esset frå Rakkestad er ikkje i tvil om kvifor dart er på «alle» sine lepper om dagen:

– At folk ser det på TV og at ein høyrer meir om det – i tillegg er det veldig lågterskel, seier Linus Gravdal, før han skyt inn:

– Men menneska og samhaldet – det er heilt fantastisk. Det gir ei sjuk kjensle, avsluttar ungguten.