Uvêr på Vestlandet: Skred gir fleire stengde vegar

– Det har vore ein del telefonar om mykje vatn og flaum enkelte stader. Vatn som renn gjennom tunnelar og vatn som gjer at den eine køyrebana er stengd. Og så har det gått nokre jord- og steinskred, seier trafikkoperatør John Andreas Omdal i Vegtrafikksentralen.

Fleire vegar er stengde på grunn av skred:

• I Oldedalen i Nordfjord har det gått eit skred som er 20 meter breitt og to meter høgt. Vegen litt lenger nede, mot Olden, er stengd.
• På Fv. 57 i Dale i Sunnfjord, rett aust for Nishammartunnelen, har det gått eit skred og vegen er stengd.
• Fv. 49 Nordrepollen i Ullensvang er stengd på grunn av jordskred.
• Tysdag kveld gjekk det eit jordskred over E39 langs Hornindalsvatnet i Nordfjord. Her kan det bli stengd gjennom heile dagen.
• Fleire vegar er også stengde på grunn av skredfaren. Blant dei rv. 13 nord for Odda. Der er det stengt mellom Freimsbekken og Brakavik, ifølgje Statens vegvesen.

Det er meldt ekstreme mengder nedbør og det er sendt ut raudt farevarsel for både flaum og skred. Det er venta mellom 80 og 120 millimeter nedbør i løpet av eit døgn i store deler av Vestland også ondag.

Jobbar på spreng for å redda bygg

På Kaupanger i Sogn har fleire næringsbygg fått vatn inn i lokala. Blant dei er ein bilverkstad. Mannskapar frå brannvesenet og Sivilforsvaret er på staden.

– Me jobbar på spreng for at ikkje fleire bygg skal bli råka. Det er mykje vatn, sa Dan Inge Gjesdal, som er fungarande vaktkommandør i brannvesenet, onsdag morgon.

Mannskapa skal no ha kontroll på situasjonen, ifølgje brannvesenet.

Også i Møre og Romsdal var brannvesenet ute fleire stader tysdag kveld for å handtera overfløymingar.

Utan mobildekning i Lærdal

Delar av Lærdal er råka av ingen eller sterkt redusert mobildekning. Området strekker seg frå Sjurshaugfossen i vest til fylkesgrensa mot Buskerud (Hemsedal) i aust.

Entreprenør har utfordringar med å koma inn til det dei trur er skadestad på grunn av steinskred i området, opplyser Telenor. Feilretting er difor avbrote og held fram så fort det let seg gjera.

Brotet er i eit område med ras langs fv. 680 vest for Steinklepp. Total er åtte basestasjonar råka.

Fleire fjellovergangar er stengde på grunn av uvêr:

Opp mot 150 millimeter nedbør

Det er venta at regnet roar seg onsdag morgon, men at det tek seg opp igjen utover dagen. Nokre stader blir det kraftig nedbør. Verst blir det i indre strøk på Vestlandet.

Lokalt kan det koma ekstreme nedbørsmengder på mellom 120 til 150 millimeter regn i løpet av 24 timar.

– Dette er nedbørsmengder som er på nivå med ekstremvêret Jakob, sa Ivar Berthling, vaktsjef i NVE til NRK tysdag.

• Ekstremvêret Jakob trefte Vestlandet i oktober i fjor.