Ambassadørar kalla inn på teppet etter russiske truslar mot utlendingar i Kyiv

Utanriksdepartementet kalla tysdag inn Russlands ambassadør for ei samtale.

– Vi kalla inn ambassadøren for å protestere mot de uttalte truslene mot utanlandsk personell i Ukraina som Russland har kommet de siste dagene, uttalar utanriksminister Espen Barth Eide (Ap) ifølge ei pressemelding.

Blant truslane han viser til, er ei melding frå det russiske utanriksdepartementet måndag.

Der åtvara dei om «ei systematisk serie med åtak mot ukrainske militære mål i Kyiv».

Bad utlendingar forlata Kyiv

I meldinga bad dei òg utlendingar, inkludert tilsette ved ambassadar og i hjelpeorganisasjonar, om å forlata den ukrainske hovudstaden.

Eide var måndag svært tydeleg på at Noreg ikkje ville følga den oppmodinga.

– Verken me eller andre kjem til å trekka oss ut på grunn av dette. Det er ein grunn til at me er der – for å hjelpa Ukraina i ein svært dramatisk situasjon, sa han.

Europeiske reaksjonar

Utanriksdepartementet i Noreg er ikkje dei einaste som har reagert kraftig på dei russiske truslane.

Òg i Tyskland og Nederland har dei russiske ambassadørane vorte kalla inn på teppet, skriv Reuters.

– Åtak på sjukehus, skular og tyske TV-studio, oppmodingar om at ambassaden vår skal forlata Kyiv. Russland har tatt i bruk truslar, terror og opptrapping. Det er grunnen til at me har kalt inn Russlands ambassadør i dag, skriv tysk UD på X.

Tyskarane skriv vidare at dei ikkje vil la seg trua og at framleis vil gi full støtte til Ukraina.

I helga vart òg Kyiv råka av det som fleire har kalt eit av dei største åtaka sidan fullskalakrigen starta i 2022.

Fire personar vart drepne og 83 skadd.

Russland brukte mellom anna supervåpenet Oresjnik mot hovudstaden for fyrste gong. Det er tredje gong dei har brukt dette våpenet hittil i krigen.

Interessert i det som skjer i verda? Høyr utanriksredaksjonens podkast: