Eivind (31) handplukka av YouTube-stjerne: Kan kjempe om 53 millionar i realityserie

Ein svulst i låret og ein aggressiv kreftdiagnose sette ein bråstopp for OL-draumen til Eivind Vold (31).

Men sidan diagnosen blei påvist, har han ikkje lege på latsida. Han har tatt personlege rekordar i benkpress og sprunge New York maraton i sjukdomsperioden – no satsar han på eit ellevilt realityshow.

Vold er nemleg plukka ut som ein av svært få som kan representere Noreg i Amazon-satsinga «Beast Games», skapt av YouTube-giganten MrBeast.

Konseptet er like lett som det er ekstremt: éin deltakar frå kvar nasjon i verda kjempar om ein svimlande premiepott på 5 millionar dollar – over 50 millionar norske kroner.

– Eg såg ei utlysing på Instagram der dei søkte representantar frå alle land. Eg har kanskje ikkje eit OL-gull, men eg har ei spesiell historie, fortel Vold til NRK.

– Har vore nedturar

Historia han snakkar om, er smått utruleg.

I 2019 fekk veslebroren Amund påvist leukemi rett før OL-kvalifiseringa i padling. Den eldste broren i flokken, Lars Christian, redda han med sin eigen beinmerg. Då dei endeleg kjempa seg tilbake mot verdstoppen i 2023, var det Vold sin tur til å få kreftbeskjeden.

– Det er mange som ikkje blir det same etter det. Men rett før cellegifta starta, tenkte eg at dette var siste sjanse. Eg sette rekord i padling over Skagerrak rett før behandlinga begynte, seier han.

– Ting har gått bra, men det har vore nedturar når ein går glipp av OL-draumen. Det har vore jævla tungt til tider, fortset han.

Gjekk opp i muskelmasse

Mens han var under behandling, nekta han å la kroppen forfalle. Han trena så hardt at han gjekk opp i muskelmasse og sette personlege rekordar i styrkerommet. Berre månadar etter enda kur sprang han New York maraton på tida 2.39.

Det er denne ekstreme mentale og fysiske styrken han nå håpar skal bere han heilt til topps i «Beast Games».

– Det er ikkje akkurat slike pengepremiar i padling, seier han.

Han fortset:

– Sjukdommen har sett meg litt tilbake sportsleg, og eg kjempar ikkje om VM-medaljar lenger. Men eg er allsidig, og eg trur den ballasta eg har med meg kan vere ein fordel i eit spel som dette.

Brutalt spel

«Beast Games» har allereie rokke å bli berykta. Tidlegare deltakarar har saksøkt produksjonen for det dei meiner er uforsvarlege forhold, med lite mat og søvn, og enorme fysiske påkjenningar.

– Eg skjønnar kritikken, og eg ser at det er ekstremt stressande. Eg måtte nyleg gjennom eit langt intervju med ein amerikansk psykolog i forkant. Det verkar enormt intenst, men eg kjenner eg er vand til å takle press gjennom idretten. Eg er glad i slike utfordringar og oppsøker slike settingar frivillig, forklarer han.

For Vold, som har møtt på hinder i idretten og livet, verkar ikkje utfordringane i USA skremmande.

– Ein lærer mykje av alt ein går gjennom. Eg har prøvd å snu det til noko positivt. Det blir eit eventyr om eg får moglegheita, og det er jo ekstremt «high stakes» når det er snakk om så mykje pengar.

– Eivind betyr «øy-vinnar»

31-åringen legg ikkje skjul på at dei enorme summane er ein stor motivasjon.

– Padling er ikkje ein idrett der det er store premiepengar, så det gjer det ekstra interessant. Ein må vere såpass ærleg, seier Vold til NRK.

Han har fått med seg at premiane i Mrbeast-universet kan vere kreative.

– Ein kunne visst vinne ei privat øy òg. Eg sa til produksjonen at namnet mitt, Eivind, betyr faktisk «øy-vinnar», seier han og flirer.

Om Vold blir den endelege norske representanten som står på startstreken i den kommande sesongen, blir avgjord i løpet av kort tid ved ei avstemning. Det står mellom Vold og to andre nordmenn.