Forslag om nye nasjonalparkar skaper bråk: – Får det tredd over hovuda våre

Eirik Pessl-Kleiven / NRK

Alfred Bjørlo, Venstre

Vi bør opprette fleire nasjonalparkar – både til lands og til havs. For å få opp tempoet i vernearbeidet i Noreg etter stillstanden dei fire siste åra, trengs det først og fremst ei ny regjering der eit miljø- og naturparti har handa på rattet. All røynsle tilseier at Arbeiderpartiet, som MDG vil at skal sitje ved makta også etter valet, er ein bremsekloss i arbeidet med å verne meir norsk natur.

Sabima

Einar Wilhelmsen, Generalsekretær i Sabima

Vi treng fleire nasjonalparkar. Det er heilt nødvendig for å ta vare på naturmangfaldet vårt. I dag er det veldig skeivt fordelt med mykje fjell, vi manglar særleg vern i låglandet, langs kysten og i havet. Veldig mange av dei trua artane i Noreg er i skogen, men vi er langt unna Stortingets mål om 10 % vern.

Gina Aakre / Gina Aakre / Skog

Per Skorge, adm.dir. i Norges Skogeierforbund

Lokal aksept må vere ein føresetnad, og kommunane må få ei tydeleg rolle i prosessen. Forskinga viser at det biologiske mangfaldet best blir varetatt ved å verne mange område framfor nokre få og store. Det er akkurat slik vi gjer det i dag, gjennom frivillig vern av skog.

Stine Mari Velsvik

Dag Sandvik, naturvernansvarleg i Bergen og Hordaland turlag

Nye nasjonalparkar og verneområde er kjærkomme for alle som er glad i naturen. Det er eit av fleire grep som er naudsynt dersom ein skal gjere alvor av dei politiske måla om å ta betre vare på naturen. Verneområda set klare grenser for kvar vi ikkje kan bygga ned naturen – bit for bit – med vegar, hyttelandsbyar og kraftverk.

MDG

Une Bastholm, parlamentarisk leiar i MDG

Naturen blir bygd ned bit for bit, fordi ansvaret er pulverisert. Staten må derfor ta meir ansvar for å bevare naturen for framtida, ved å gi natur- og matjord eit sterkt nasjonalt vern. Vi vil la staten gripe inn oftare for å stoppe nedbygging, stanse ulovlege dispensasjonar frå reglar og påskjønne kommunar som tar vare på naturen sin – ikkje dei som raserer han.

NRK

Erling Sande, Senterpartiet

Vi meiner hovudfokus no må vere å følge opp dei nasjonalparkane vi allereie har etablert. Det handlar om oppsyn og skjøtsel for å ta vare på verdiane der, og det handlar om formidling og berekraftige aktivitetar. Det er viktig for at folk og lokalsamfunn i områda der nasjonalparkane ligg, kan ha utvikling og verdiskaping knytt til aktivitetar i nasjonalparkane.

Joe Urrutia / Norsk Friluftsliv

Hans Erik Lerkelund, fagsjef for naturforvaltning i Norsk Friluftsliv

Verda står midt i ei natur- og klimakrise og det er eit akutt behov for å ta betre vare på naturen, også i Noreg. Vi meiner det må sikrast eit tilstrekkeleg vern av alle typar natur, i tråd med naturavtalen. Vi støttar derfor forslaget om å opprette fleire nasjonalparkar i Noreg. Det vil vere bra for naturmangfaldet, klimaet og friluftslivet, på både kort og lang sikt.

Alexander Nordby / NRK

Bjørn Gimming, leiar i Noregs bondelag

Når grunneigarar blir involverte tidleg og reelt, får vi betre løysingar, mindre konflikt og større naturgevinstar. Vi meiner det gir meir effekt for klima og natur å styrke tiltak i eksisterande skog- og verneområde enn å utvide med ytterlegare regulering. Naturmangfald og karbonlagring kan forbetrast gjennom aktive grep, ikkje berre gjennom restriksjonar.

NRK

Line Lillebø Osfoss, Norges Jeger- og Fiskerforbund

Nedbygging og inngrep i natur er den største trusselen mot naturmangfaldet i Noreg. NJFF meiner ulike former for områdevern er viktig for å ta vare på natur, og nasjonalparkar har ei naturleg rolle i dette. Formålet med naturmangfaldlova gir eit godt grunnlag for at vern som forvaltningsverktøy blir akseptert og har god oppslutning i befolkninga.

Ole Berg-Rusten / NTB

Terje Halleland (Frp), medlem og Energi- og miljøkomiteen

Prinsippet om «vern gjennom bruk» står sentralt i tilnærminga vår til naturforvaltning. Vi vektlegg også den private eigedomsretten sterkt i slike spørsmål. Derfor meiner vi at naturvern primært bør konsentrerast om offentleg eigde naturområde, eller baserast på frivillig avståing av grunn frå private grunneigarar.

Naturvernforbundet

«Buffersone» rundt Jostedalsbreen nasjonalpark

Onsdag aksjonerte Naturvernforbundet for å utvide Jostedalsbreen nasjonalpark til å omfatte Tverrfjellet i Jølster, der lokale krefter ønsker å bygge ein gondol opp til breen. Planane har skapt hissig debatt om behovet for ein «buffersone» rundt nasjonalparken. Ein symbolsk tur opp til Jostedalsbreen via Lundeskaret i Kjøsnesfjorden blei leidd an av nestleiar i Naturvernforbundet, Helene Ødven.

Ole Berg-Rusten / NTB

Ikkje aktuelt å «vengeklippe» det lokalet sjølvstyret

Klima- og miljøminister Andreas Bjelland Eriksen har presisert at det ikkje er aktuelt å «vengeklippe» det lokalet sjølvstyret, som andre har karakterisert som ein «akilleshæl» og «heime aleine-fest» i den norske arealplanlegginga. Presiseringa kom etter auka press – blant anna frå Naturrisikoutvalget – om å løfte meir av ansvaret over på høgare plasserte forvaltningsnivå.

Miljødirektoratet

Romarheimsdalen i Vestland

Da Miljødirektoratet peika på nye moglege nasjonalparkar i 2021, stegla fleire av grunneigarane i dei verneaktuelle områda.

Det grønfarga området er foreslått verneområde. Grensene kan bli endra i ein mogleg verneplanprosess. Dei raudstripete områda er nåverande naturreservat.