Fransk kirurg tiltalt for fleire hundre overgrep – mange av offera var barn

Kort tid etter den opprivande rettssaka mot ei rekke menn som dopa ned og valdtok Gisèle Pelicot over fleire år, blir Frankrike skaka av nok ei grotesk overgrepssak, skriv Reuters.

Tiltalen mot ein tidlegare kirurg i Bretagne er svært omfattande:

• Seksuelle overgrep mot 299 offer
• Mange av offera var bedøvde da overgrepa skjedde
• Mange av offera er barn, den yngste berre fire år gamal
• Overgrepa skal ha skjedd over fleire tiår

Ifølge The Guardian jobba kirurgen ved fleire offentlege og private sjukehus i Bretagne.

Overgrepa han er tiltalt for skjedde i perioden frå 1989 til 2014, skriv Reuters.

Dømt for fleire overgrep

I 2017 valdtok Joel Le Scouarnec den 6 år gamle naboen sin.

Da politiet undersøkte bustaden hans vest i Frankrike, avdekte dei ein enorm mengde overgrepsmateriale.

Blant anna fann dei dagbøker med beskrivingar av overgrep gjennom nesten tre tiår, sexdokker og overgrepsmateriale mot barn.

I 2020 blei han dømt til 15 års fengsel for valdtekt av nabobarnet. Han blei også dømt for seksuelle overgrep mot to nieser og ein pasient på 4 år.

Vidare etterforsking har avdekt fleire overgrep.

Fekk jobbe med barn

Sjølv om Le Scouarnec allereie i 2005 blei dømt for innehaving av overgrepsmateriale mot barn, fekk han fortette å jobbe i offentlege sjukehus heilt fram til han blei arrestert i 2017.

Det har fått mange franskmenn til å stille spørsmål om helsevesenet har god nok kontroll med tilsette i det offentlege.

Le Scouarnec, som nå har blitt 74 år, blir stilt for retten 24. februar Vannes i Bretagne, i det som er den største overgrepssaka i landet der barn er offer.

Aktoratet seier den tidlegare kirurgen har innrømt mange av forholda overfor etterforskarane. Forsvararane har ikkje kommentert dette i forkant av rettssaka.

Eit av offera, François, var 12 år da kirurgen skal ha gjort seg skuldig i overgrep mot han: Han håpar rettssaka vil gi fleire svar frå eit system han kjenner har svikta:

– Eg innser at eg aldri skulle blitt operert av denne kirurgen, seier han til Reuters.

Han ber om at berre fornamnet hans blir brukt.

– Kvifor var det ingen som nekta denne kirurgen å jobbe med barn, spør François.

Ei dagbok om overgrep

Etterforskarar har prøvd å samanlikne beskrivingane til den tidlegare kirurgen av overgrep, med pasientane han faktisk hadde.

Mange av pasientane var bedøvde på sjukehus da overgrepa skjedde og har ingen minne om overgrepa.

Likevel har fleire av dei opplevd posttraumatisk stress, ifølge rettsdokument.

Mathis, er eit anna av offera.

Han var ti år i 2007, da faren og bestefaren køyrde han til sjukehuset med magesmerter.

Bestefaren på 78 hugsar møtet med kirurgen, og tenkte ikkje noko vidare over at han bad om at guten blei liggande på sjukehuset aleine natta over.

I dagboka beskriv kirurgen å ha forgripe seg på ein liten gut på same dag og dagen etter, ifølge rettsdokument.

Ifølge bestefaren, blei Mathis aldri seg sjølv igjen etter opphaldet på sjukehuset.

Han fekk etter kvart store problem med alkohol og narkotika, og døydde av ein overdose i 2021, 24 år gammal.

Han sleit med traume tre år etter han fekk vite om at overgrepa. Besteforeldra skuldar kirurgen for døden til barnebarnet.