HRW: Israel bruker kvitt fosfor i si krigføring i Libanon

Human Rights Watch (HRW) seier dei har verifisert at Israel har brukt ulovleg ammunisjon med kvitt fosfor over bustadområde i Sør-Libanon.

– Det vil få fatale konsekvensar for sivilbefolkninga, seier Ramzi Kaiss i HRW i ei pressemelding.

HRW hevdar å ha stadfesta bruken i sju bilete frå byen Yohmor, men kan ikkje seie nokon om det var menneske i området eller om nokon har skadar frå kvitt fosfor.

NRK har vore i kontakt med Det israelske militæret (IDF). Dei har ikkje kommentert påstandane.

Kva skjer når man bruker stoffet?

Bruk av kvitt fosfor er ikkje ulovleg. Men det er strengt regulert, forklarer forskingsleiar Øyvind Voie ved Forsvarets forskingsinstitutt.

Stoffet blir først og fremst brukt til røykskjerming. Når partiklane kjem i kontakt med oksygen, reagerer dei og dannar ein kvit røyk som er svært vanskeleg å sjå gjennom.

– Formålet er å skjule eigne styrkar, våpen og materiell, slik at dei blir vanskelegare å oppdage, seier Voie.

Kvitt fosfor er svært giftig, og restar som blir liggjande på bakken kan gjere stor skade.

– Problemet er at kvitt fosfor er sjølvantennelig. Dersom partiklar treff menneske, kan dei ta fyr og føre til svært alvorlege brannskadar.

Difor kan ikkje kvitt fosvor brukast mot militære mål dersom risikoen for sivile skadar er stor.

– Kvitt fosfor kan forårsake død eller grufulle skadar som resulterer i livslang liding, seier Kaiss og viser til ein rapport av HRW frå 2020.

HRW meiner Israel bør forby bruk av artilleri med kvitt fosfor i folkesette område.

Dødelege angrep

Måndag førre veke skaut Hizbollah rakettar mot Israel i hemn for drapet på Irans øvste leiar, ayatollah Ali Khamenei.

Israel svarte med å angripe hovudstaden Beirut og fleire område i Libanon.

Libanons regjering har fleire gonger bede Hizbollah leggje ned våpena for å unngå nye krigar med Israel.

394 personar er drepne i Libanon som følge av denne krigen, sa Libanons helseminister Rakan Nassereddine, melde AFP.

– Dette er sivile som har blitt angripe, ikkje militært personell og militære installasjonar slik dei hevdar, sa Nassereddine.

IDF hevdar at dei går etter Hizbollah og gruppa sin infrastruktur. Det tar grep for å «avgrense skade på sivile», skriv IDF på Telegram etter angrepa gjennom helga.

Internasjonal protokoll om brannvåpen

HRW hevdar at Israel sin våpenbruk i Libanon bryt med internasjonal humanitærlov av Genèvekonvensjonane.

Protokollen som tar for seg bruk av brannvåpen nemner ikkje bruk av kvitt fosfor direkte, men er tydeleg på at sivilbefolkning ikkje skal bli gjort til «objekt til gjenstand for angrep med brannvåpen».

Libanon har signert protokollen. Det har ikkje Israel.

22. november 2023 brukte IDF truleg artilleri med kvitt fosfor over Kfar Kila i Libanon. 18. oktober 2023 brukte israelske soldatar ammunisjon som, ifølgje Faktisk.no, samsvarar med kvitt fosfor i Galilee-regionen nord i Israel.

Foto: Hussein Malla / AP / NTB og Jalaa Marey / AFP / NTB

HRW har også tidlegare varsla om israelsk bruk av kvitt fosfor i bombinga av Gaza og Libanon hausten 2023.

No seier organisasjonen at dei har analysert bilete og videoar som tyder på at stoffet er brukt i libanesiske område.

– Dersom ein ser mange små brennande partiklar som dannar mykje kvit røyk, kan det tyde på kvitt fosfor, seier forskaren Voie.

Men: Fleire røyksatsar som ikkje er like strengt regulert, kan gi same effekt.

– Difor må ein gjere ei kjemisk analyse for å vere heilt sikker, seier Voie.

I oktober 2023 blei ammunisjon med kvitt fosfor brukt sør i Libanon, på grensa til Israel.

IDF avviste påstandane.

Ifølgje IDF hadde dei prosedyrar som kravde at ammunisjon med kvitt fosfor «ikkje blir brukt i folketette område, med visse unntak. Dette oppfyller og går utover krava i folkeretten».

Du kan lese meir om tidlegare bruk av ammunisjon med kvitt fosfor i Libanon her:

Interessert i det som skjer i verda? Høyr Urix sin siste podkast-episode: