Klæbo får gullmedaljen på heimebane: – Utan tvil den kulaste dagen i mitt liv

– Eg må få seie tusen hjarteleg takk til alle som både har vore i Granåsen og som har tatt turen hit.

Det seier ein rørt Klæbo framfor folkehavet i Trondheim sentrum.

– Dette er utan tvil den kulaste dagen i mitt liv. Dette er noko eg har venta på i fleire år og det å få lov til å stå her no saman med alle dykk – eg kunne ikkje bedd om meir.

Blant dei som har møtt opp er Hulda Marie Overvik, Nora Overvik Balstad og tusenvis av trønderar.

– Me feirar eitt gull og to sølv, legg dei to til som også var i Granåsen for å heie fram nordmennene.

Ronja Myhr har også møtt opp og seier ho gler seg mest til å sjå Klæbo ta imot gullmedaljen på heimebane.

– Eg har lyst til å kjenne på stemninga og gler meg til å sjå utøvarane som får medaljar.

Johannes Høsflot Klæbo tok gull på sprinten, Kristine Stavås Skistad tok sølv på sprinten og Gyda Westvold Hansen tok sølv i fellesstart kombinert.

Gull på heimebane

– Ein blir stolt av å vere trønder på dagar som dette, seier Klæbo og ser utover folkehavet som har møtt opp på medaljeutdelinga.

Trønderen sette eit vanvettig tempo opp den siste bakken og gjekk i mål til vill jubel frå publikum.

Også mamma Klæbo har møtt opp for å sjå sonen ta imot gullmedaljen i heimbyen.

– Heile familien er her og me skal vere med på kvart stavtak, seier Elisabeth Høsflot Klæbo.

Syngande ordførar opna VM

Under opningsseremonien var det ordførar Kent Ranum som stal merksemda til publikum då han overraska alle med ein song.

– For det første tenkte eg at eg er så heldig som bor i Trondheim og er trønder, sa Ranum etter framføringa.

Også han blei hylla av både trondheimspublikummet og kronprinsparet.

– Det var helt ubeskriveleg, rett og slett. Folk møter opp og heier, hyllar og klappar.