Mann pågripen etter fleire nye brannar på Stord

I løpet av natta har det vore fem nye brannar på Stord. Politiet er usikre på om det kan vere fleire gjerningspersonar og har fleire patruljar i søk.

Ingen personar er skadde i brannane.

– Vi har kontroll på alt av brannar, og vi har pågripe ein person i samband med brannane. Vi held fram å søkje etter eventuelt fleire gjerningspersonar, seier innsatsleiar for politiet, Kristian Alfredsen.

Fleire politihundar, patruljar og dronar deltek i søket.

Ein mann i 20-åra er pågripen etter ordre frå jourhavande politijurist. Han vart arrestert i nærleiken av ein av brannen.

Ifølgje politiadvokat Anne Mette Dale i Sør-Vest politidistrikt er dette ein mann i 20-åra som sist veke vart sikta etter ein brann ved Stord Kristne Skule.

Mannen vart seinare lauslaten. Han ville ikkje late seg avhøyre.

– Han er sikta for to av brannane som skjedde natt til tysdag, seier ho.

Dale ynskjer ikkje å kommentera om han hadde ting med seg for å starta brann då han vart arrestert.

– Me vil nok i løpet av dagen ta stilling til om me skal be om varetektsfengsling, seier Dale.

Tre brannar på ein halvtime

Under utrykking til brann i ein kiosk ved Sponavikjo badeplass like før klokka 08, kom politiet over eit nytt branntillaup i eit teknisk bygg på same plass.

Sistnemnde blir brukt som lagringsplass for veteranskipet MS Sunnhordland. Her var det mellom anna redningsflåtar, redningsvestar og 500-600 liter brannfarleg måling.

– Alt er øydelagd av vatn, seier vaktmeister og vedlikehaldsansvarleg Paul Matre.

Nokre minuttar seinare fekk politiet melding om brann i ein gapahuk i Gullbergskogen, som også er i same område.

Like over klokka 09 fekk politiet melding om ytterlegare røykutvikling i same området – då i nokre bunkerar på toppen av Gullbergskogen. Dette viste seg å vere røyk frå eit bål.

– Vi har sett ganske mykje ressursar, og vi trur at brannane er påsette og leitar etter det vi trur er gjerningsmennene, seier operasjonsleiar ved Sør-Vest politidistrikt, Steinar Knudsen like over klokka 08.

Såg mann springe

Eit vitne NRK har snakka med var i området, og fortel at ho såg ein mann som kasta hette over hovudet og sprang frå staden. Ho ringde naudetatane.

– Då eg snudde meg, såg eg at det kom røyk frå kiosken. Det kom berre meir og meir, så då ringe eg alarmsentralen, fortel vitnet.

– Korleis opplevde du det?

– Det er litt skummelt når det skjer fleire stader i same området.

Innsatsleiar Alfredsen har forståing for at innbyggjarane kjenner seg utrygge etter så mange brannar på kort tid.

– Men vi håpar jo no at vi kanskje kan ha tatt vedkomande som har stått bak dette. Vi ynskjer framleis tips frå publikum om eventuelle observasjonar gjort i løpet av natta eller i dag tidleg, seier han.

Ni brannar på to veker

Også måndag kveld og natt til tysdag var det to brannar. Totalt har det vore ni brannar på to veker på Stord.

Operasjonsleiar Knudsen seier at det ikkje er unaturleg å sjå brannane tysdag morgon i samanheng.

– Det er ikkje naturleg at det startar tre brannar innanfor eit gjeve tidsrom, utan at det er personell til stade. Så sjølvsagt ser vi på det i samanheng, seier han.