Meiner dette antrekket er kvinnefiendtleg: – Det er flautt og pinleg

– Eg hatar kvite shortsar. Eg kan forstå at det kan sjå pent ut, men fordi vi er damer og har noko kvar månad, så synest eg ikkje det er gøy å spele i kvit shorts, smell det frå Veronica Kristiansen.

Debatten om kvit shorts for kvinner i idretten har rast i mange år. Mange nasjonar og klubbar i ulike idrettar har lytta til utøvarane sine. Men i handballen er det framleis ein veg å gå.

Kristiansen, som er tilbake for fullt etter at ho blei mamma for andre gong i januar, kjenner det dagleg på kroppen.

Hennar ungarske klubblag Györ, som det siste året har spelt i grøn topp og shorts, har før årets sesong bytta ut den grøne shortsen med kvit i hovuddrakta.

– Vi har sagt ifrå at vi ikkje ønsker å spele i kvit shorts, men det har ikkje kome så mykje lenger enn det, seier ho oppgitt til NRK.

For protestane har ikkje blitt lytta til.

– For meg personleg synest eg det både flautt og pinleg, og det (menstruasjonssyklusen) er noko ein ikkje kan styre over. Så vekk med kvit shorts, «please».

Ho får støtte av Noregs landslagskaptein Henny Reistad.

– Eg er jo ikkje veldig fan av kvite shorts eg heller, så om det er noko ein ikkje ønsker seg, så bør ein lytte til det, for det kan vere veldig ubehageleg.

NRK har forsøkt å kontakte den ungarske klubben Györ, men har ikkje fått noko svar.

Kvinnefiendtleg

Handballforbunda i Noreg, Sverige og Danmark har no gått saman og forfatta eit brev til det internasjonale handballforbundet, IHF, der dei krev regelendring før VM i Tyskland og Nederland til vinteren.

– Ein regel som pålegg å ha med ein lys underdel opplever vi som kvinnefiendtleg, seier Randi Gustad, president i det norske forbundet.

Ho seier vidare at alle ho har spelt handball med hatar det med tanke på at dei menstruerer ein gong i månaden.

Ifølge regelboka til IHF står det nemleg klart og tydeleg at alle lag skal ha med seg eit sett med mørk shorts og eit med lys shorts.

Medan det norske kvinnelaget i ei årrekke har nytta seg av heilblå drakter, kvit overdel og mørk shorts eller raud overdel og blå shorts, så har danskane med sitt raude og kvite flagg hatt større utfordringar.

Så seint som under møtet mot Noreg under OL i fjor måtte dei danske jentene ikle seg den kvite shortsen. Det likte dei danske spelarane dårleg.

– Vi har dokumentert tilfelle som syner denne utfordringa, inkludert noko frå dei nylege olympiske leikar, skriv den danske handballpresidenten Torsten Laen i brevet til toppane i IHF.

Han har mellom anna lagt ved biletbevis i brevet.

Han legg til at vanlege tiltak for å beskytte, som indre shortsar og andre løysingar ikkje har vore tilstrekkeleg for å løyse problemet fullstendig.

– Generelt medfører alle lyse alternativ liknande utfordringar med tanke på synlegheit ved eventuell bløding, skriv Laen vidare.

NRK har tidlegare omtalt professor Alex Krumer i Molde si forsking som syner at kvinner i fotballen tek færre poeng om dei spelar i kvite shortsar.

Ikkje noko menn tenker på

Adrian Costeiu, som arbeider i medieavdelinga til IHF, seier at det vart oppretta ei arbeidsgruppe som diskuterte problematikken i 2023. Sidan det har det vore stille. Heilt til brevet frå dei skandinaviske forbunda dukka opp, seks veker før meisterskapet.

– Det er naturlegvis ikkje mogeleg å endre det offisielle reglementet for meisterskapet med så kort tid igjen før turneringsstart.

Han seier dei likevel vil legge til rette for at dei landa som ikkje vil spele med kvite shortsar slepp det i dette meisterskapet.

– Danmark har for eksempel sendt inn kvite, raude og svarte shortsar til dette meisterskapet. Vi vil gjere det vi kan for å sikre at Danmark, og alle andre lag i same situasjon, får spele i raude eller svarte, eller andre mørke shortsar, dersom kampoppsett og forholda tillèt det.

Dei norske landslagsspelarane er likevel krystallklare på at eit forbod er einaste vegen å gå.

– Det kunne eg fint stilt meg bak. Det gir jo god meining på fleire område, sjølvsagt. Og eg er så gamal at eg har vore med å spele i kvit shorts for Noreg og det var ikkje noko vinnar det, seier Nora Mørk til NRK.

Verdas beste handballmålvakt, Katrine Lunde, er ikkje overraska over at det framleis er slik i 2025.

– Om det er mannfolk som sit og bestemmer det, så forstår eg at det kanskje ikkje er det dei tenker mest på, men for jenter kan det vere utfordrande.

Kristiansen håpar debatten som no blir reist vil føre fram.

– Det hadde vore veldig deilig og absolutt i positiv retning. For min del, og eg veit veldig mange andre handballspelarar, som ville synst det same.

Gaustad meiner et forbod også vil ha stor signaleffekt for breidda i handball.

– Vi veit at barn og unge i mange klubber rundt omkring spelar i lyse shortsar, og viss det er ein grunn til at man ikkje ønsker å gå på trening eller spele kamp, så må man gjere noko med det. Her heng man litt etter synst eg, så her må det skje noko.