No kjem sommaren tilbake – kan bli oppimot 28 grader

Varm luft er på veg inn over Sør-Noreg, og torsdag kan fleire stader få høgsommardag.

Det vil seie temperaturar over 25 grader.

Varmen ser ut til halde seg over sørlege delar av Noreg til og med fredag, ifølge meteorologane.

Temperaturstigninga vil også gje moglegheiter for kraftig torevêr.

Sommardagar i sikte

Sør-Noreg får eit kraftig pust av sommarvarme denne veka. Onsdag og torsdag blir prega av sol og høge temperaturar.

Vestlandet får ein brå temperaturauke, og det er særleg ytre strøk som kan få dei høgaste temperaturane.

– Vi ser at det kan bli opp mot 27–28 grader lokalt torsdag, seier meteorolog ved Meteorologisk institutt, Geir Ottar Fagerlid.

– Det er varm luft som kjem inn sør frå kontinentet, og det gir oss ein høgsommardag med god margin.

Mens Vestlandet får eit kortvarig møte med varme, ser Austlandet ut til å fleire dagar med stabilt og varmt vêr.

– Austafjells blir vêrvinnarar dei neste ti dagane, seier Fagerlid.

Sørlandet får òg fint vêr, men kan få slengar av nedbør frå Vestlandet. Likevel blir det stort sett varmt og tørt.

Lokale regnbyer og torevêr

Varmen på Vestlandet er dessverre for vestlendingane ikkje langvarig. Frå seint torsdag ettermiddag og kveld kan vêret endre seg brått.

– Då trekkjer det inn regnbyer med fare for torevêr frå sør. Det er potensial for ganske kraftig torevêr, forklarar Fagerlid.

Han forklarar at det er overgangen frå varm kontinentalluft til kjøligare maritim luft som utløysar byene.

– Det kan vere uttrykk for lyn, tore og styrtregn. Slike byer kan vere svært lokale, der nokre stadar kan sleppe unna, medan andre får det ganske hardt.

NRK har tidlegare fortalt om at sommaren er høgsesong for lyn og torevêr, der hetebølgjer og varmluft gir perfekt forhold for slikt uvêr.

Frå fredag av blir temperaturane lågare, og slik vil det halde seg utover helga.

– Då blir det tørrare, men små kjølig. Vi snakkar om 15–20 grader som makstemperatur og nokon glimt av sol, men ingen varme slik som vi får no på torsdag, seier Fagerlid.

Tendensar til haustvêr i nord

Lenger nord i landet blir situasjonen ein heilt annan. i Nord-Noreg ser det ut til å bli ei våt og vindfull helg.

– Fredag blir spesielt dårleg, med mykje nedbør og vind særleg i Nordland og Troms og Finnmark.

Laurdag og søndag held det fram med bygevêr, og temperaturane kan falle heilt ned mot 10 grader.

– Der liknar det meir på haust enn sommar, seier Fagerlid.