Noreg vann med kalassiffer: – Det er for mange lag i EM

Med 38-15-siger tangerte Noreg sin eigen rekord ved å vinne med 23 mål i ein EM-kamp.

– Det er for mykje med 24 lag i EM for kvinner på noverande tidspunkt. Det er ikkje mange nok gode lag i Europa per no, meiner handballekspert og tidlegare landslagskeeper Ole Erevik.

– Når ein ser korleis denne kampen utviklar seg så er det greitt å stille spørsmål ved om det er for mykje med 24 lag i EM, sa Viaplay-ekspert Karoline Dyhre Breivang til NRK i pausen.

Første gong med 24 lag

Til slutt vann Noreg med 23 mål i ein kamp dei kunne ha tapt og likevel ha vunne gruppa.

– Vi var sånn passe overlegne. Slovakia gav eigentleg litt opp, sa landslagssjef Thorir Hergeirsson til TV 2 like etter kampslutt.

Kenneth Gabrielsen, som følgjer EM som ekspert for NRK, ser på dei store siffera i EM på ein annan måte enn Ole Erevik og Karoline Dyhre Breivang.

– For oss som slåst om medalje kvart år så kan vi bli litt høge på oss sjølv og ikkje sjå verdien av det, seier Kenneth Gabrielsen.

Dette er første gong EM for kvinner blir spelt med 24 lag.

35 lag ønskte å delta. Altså kom 69 prosent av laga som ønskte det til EM.

Det inkluderer debutantar som Tyrkia og Færøyane.

– Kan ikkje bli større

Noreg opna EM ved å slå Slovenia 33–26. Deretter vart Austerrike sabla ned med siffera 38–24.

Samtidig har Slovakia tapt 37–24 både mot Austerrike og Slovenia.

Derfor var det ikkje så uventa at Noreg valsa over Slovakia.

Slovakia opna frisk og leia 3-1, men frå stillinga 4–4 scora Noreg 11 mål utan at Slovakia fann nettmaskene.

Og derifrå vart differansen berre større og større.

TV 2-kommentator Harald Bredeli minte om at «Noreg har grisebanka laga som har grisebanka Slovakia».

– Det kan ikkje bli større forskjell i Europa enn dette. Slovakia er her mykje fordi EM er utvida frå 16 til 24 lag, sa Bredeli.

– Forbundet ønskjer å spreie interessa for handballen rundt om. Det i seg sjølv er jo ganske fint. Eg er ikkje negativ til utvidinga, sjølv om resultata kan bli store. Det må vi tole, meiner Kenneth Gabrielsen.

– Ikkje sjåarvennleg

Ein annan NRK-ekspert, Håvard Tvedten, meiner at tanken med 24 lag i EM er god.

Men då må dei svakaste laga bli betre, ifølgje den tidlegare landslagsprofilen, og Tvedten kjenner ikkje til korleis til dømes Slovakia jobbar for å få opp nivået.

– Det hjelper ikkje å invitere inn mange lag om det ikkje blir gjort noko i bakkant. Det er openbert stor nivåforskjell på damesida, og ein får ikkje så mykje ut av dette. Dette er verken sjåarvennleg eller spennande, seier Tvedten.

– Kvaliteten blir betre

Presidenten i det europeiske handballforbundet, Michael Wiederer, forklarer auken i talet på lag blant anna med at europameisterskapa skal vere like for menn og kvinner.

EM for menn hadde 24 lag for første gong i 2020.

I intervjuet med Wiederer, som er publisert på det europeiske handballforbundet si nettside, seier presidenten også at det må tre meisterskap til for at ein skal kunne konkludere med om auken er ein suksess.

Altså må vi vente til 2028 før vi veit om det nye formatet har vore ei smart endring.

– Vi kjem til å sjå nokre store sigrar i turneringa, men auken til 24 lag kjem også til å ha ein positiv effekt. Kvaliteten kjem til å bli betre, det er eg veldig sikker på, seier Wiederer.

– Slovakia er ikkje der

Ifølgje NRK-kommentator Patrick Rowlands er det «ingen tvil om at herrehandballen er meir klar for ei utviding i Europa enn det kvinnesida er».

Han viser til at nivåforskjellen blir for stor.

Akkurat det er Kenneth Gabrielsen einig i.

– Når det er sagt har vi hatt positive innslag her i denne meisterskapen, i blant anna Portugal og nokre andre lag som har gjort ein god figur, men Slovakia er dessverre ikkje der, meiner NRK-eksperten.