På flukt i Libanon: – Vi har ingen stad å dra

NRK har snakka ein libanesisk familie som no bur på gata.

– Vi sov ei natt ute på gata. Så laga vi desse telta, seier Hussein Al-Rahal.

NRK møtte han og familien midt i Beirut, i eit telt dei har sett opp i eit tomt butikklokale i sentrum av byen.

Hussein og kona har flykta frå bydelen Dahieh, sør i Beirut.

Tysdag varslar Israel lengre okkupasjon av eit område i Sør-Libanon på ubestemt tid, ifølge Haaretz.

Ein annan type Id-feiring

Den israelske forsvarsministeren, Israel Katz seier at israelske styrkar skal bli verande i ein «sikkerheitssone» i dette området for å garantere sikkerheit for Nord-Israel.

Det vil innebere ein langvarig israelsk kontroll over delar av Sør-Libanon.

Hundretusenvis av innbyggarar får ikkje returnere.

Når NRK snakkar med familien, er id-feiringa like rundt hjørnet.

Hussein fortel at dei vanlegvis står opp, tar på seg dei finaste kleda og går ut for å feire, men at det no blir annleis.

– Vi prøver å forklare barna våre at dette blir ei anna type id, seier Hussein, og legg til:

– Vi seier til dei at dette er ei feiring, sjølv om ho er tung.

Familien fortel at kvardagen er prega av uvisse fordi dei israelske angrepa kan kome når som helst.

– Israel kan slå til når som helst, utan åtvaring, seier Hussein.

– Vi kan bli treft av ei bombe og døy eller bli skada.

Kona Samar Osaili, bryt inn:

– Vi lever med nervane utanpå kroppen.

– Vi høyrer skyting i nærleiken. Vi veit ikkje når det kan ramme oss.

Ekteparet fortel at barna er redde.

– Eg sa til dei: ikkje ver redd, du er med meg. Eg har lova at familien min skal vere trygg.

Familien er langt frå åleine.

Ifølge FN er over ein million menneske no drivne på flukt i landet etter at Israel har beordra innbyggarar til å evakuere store delar av landet.

Mange av dei bur i mellombelse løysingar som skular, stadion og tomme bygg i hovudstaden.

Har ingen stad å dra

Tryggleiken for libanesarar er no svært utrygg.

– Vi har ingen stad å dra, seier Hussein.

Han fortel at lageret han jobba ved er bomba, og at arbeidet no er borte.

Dei siste dagane har vore regnfulle i Beirut.

– Vi tar ned telta om natta på grunn av vêret.

Samar held fast ved håpet:

– Sør i landet er heimlandet vårt. Vi ønsker fred, seier Samar.

Libanon blei trekt inn i den regionale krigen 2. mars, då Hizbollah begynte å skyte rakettar inn i Israel som eit svar på drapet på Ayatollah Ali Khamenei.

Israel svarte med omfattande luft- og bakkeangrep i Libanon, som dei seier er retta mot Hizbollah.

Libanesiske styresmakter seier atdesse angrepa har drepe meir enn 1.000 menneske, ifølge Reuters.

Brukar fotballstadion til å huse fordrivne

Situasjonen deira er langt frå unik.

I eit stadion i Beirut bur no rundt 970 internt fordrivne, ifølge Libanesisk Raude Kross.

Sist den blei brukt var under hamneeksplosjonen i 2020.

– Mange budde på gata, og målet var å få dei inn hit, seier Ziad al Rais, katastrofedirektør i Libanesisk Raude Kross.

Han fortel at anlegget eigentleg ikkje er laga for å vere eit mottak, og at kapasiteten no blir utvida til opptil 3.000.

Israel ønsker å okkupere delar av Sør-Libanon

Måndag sa Israels finansminister Bezalel Smotrich at Israel bør utvide grensa heilt opp til Litani-elva, ifølge Reuters.

Israel har sidan 2. mars beordra evakuering sør for Litani-elva og gjennomført omfattande luftangrep, som dei seier er retta mot Hizbollah.

Litani-elva går tvers gjennom Sør-Libanon.

Samstundes fortel ordførarar i Sør-Libanon at det israelske militæret (IDF) har kravd at fordrivne i dette området må bort frå fleire landsbyar innan 24 timar og bedt om namnelister på alle fordrivne. ifølge AFP.