På innsida av «Slaktarhuset»

Gjørme, spindelvev, avføring og ein intens stank.

Det er realiteten som møter NRK i dei vesle cellene på innsida av «Slaktarhuset».

Livet bak murane

32 år gamle Ammar Rahim al-Mahmoud er tilbake i fengselet som vekkjer vonde minner.

– Dei tok meg til fange, slo og torturerte meg. Sjå, dette er sigarettmerker frå 2012, seier han og brettar opp den raude genseren for å vise brennemerker til NRK.

Militærfengselet i utkanten av Syria sin hovudstad Damaskus blei drive av Bashar al-Assad-regimet fram til opprørsgrupper velta diktatoren søndag i førre veke.

Dei første fangane kom til fengselet i 1987.

I januar 2021 rekna Syrian Observatory for Human Rights (SOHR) med at 30.000 internerte var blitt brutalt drepne her sidan starten av borgarkrigen i landet.

Amnesty International har dokumentert bruk av tortur, mishandling, avrettingar og forsvinningar her i årevis.

Det var Amnesty International som gav fengselet tilnamnet «Slaktarhuset» i ein rapport frå 2017.

– Denne blei brukt til å slå folk i bakhovudet og torturere innsette, seier Bassam al-Ali og held opp ein stokk han har funne i ei av cellene.

Tomme celler

Etter at Assad-regimet blei styrta av opprørsgrupper søndag i førre veke, har tusenvis av syriske familiar tatt turen til fengselet i håp om finne sine kjære.

Det som møtte dei, var tomme celler.

I 12 lange år har Ahmed Hassan al-Omar venta på å få sjå faren og onkelen sin att.

– Eg veit ikkje kvar dei er, om dei er levande eller daude. Eg har inga aning, fortvilar han.

28-åringen fortel til NRK at både faren og onkelen blei arresterte i 2012, men familien fekk aldri vite kvifor.

Dei har heller ikkje fått noko form for livsteikn på alle desse åra.

No har Ahmed slått leir utanfor fengselet saman med hundrevis av andre for å få svar på kva som har skjedd med familiemedlemmane deira.

– Eg ber til Gud om eit teikn. Å finne spor etter dei. Kleda deira. Vi treng informasjon for å vite om dei framleis er i live, seier han fortvila.

Søk- og redningsgrupper har gått gjennom kvar sjakt, ventil og kloakkåpning dei siste dagane i håp om å finne fangar i skjulte rom eller hemmelege kjellaretasjar.

Dette søket er no avslutta utan hell.