Politiet om drapet på Janne Puhakka: Grufullt og brutalt

13. oktober i fjor blei Janne Puhakka funnen drepen i bustaden han hadde delt med sin tidlegare sambuar, i Esbo i Finland.

Forholdet mellom 29-åringen og den drapssikta nordmannen i 60-åra skal ha tatt slutt kort tid før drapet.

Saka går no vidare til påtalemakta, opplyser politiet til den finske rikskringkastaren Yle.

Skoten to gongar i brystet

Det finske politiet som no har ferdigstilt etterforskinga meiner drapet var planlagt, grufullt og brutalt.

– Politiet mistenker at offeret kort tid etter han kom blei skoten to gongar i brystet med eit skytevåpen.

Det seier kriminalinspektør Matti Högman i ei pressemelding. Drapsvåpenet er eit jakthagle som mannen hadde tillating til å ha i Noreg.

Puhakka skal ha kome på besøk til bustaden han tidlegare delte med den utflytta trønderen mellom klokka 14 og 15 den 13. oktober i fjor. Politiet blei varsla om drapet i 20-tida same kveld.

– Basert på avhøyret var motivet for lovbrotet slutten på forholdet, skrev finsk politi i ei tidlegare pressemelding.

Nordmannen frå Trøndelag har erkjent at han skaut og forårsaka Puhakka sin død. Han nektar for at drapet var planlagt, ifølge forsvarer Ville Luoto.

– Han er knust og synest veldig synd på offeret og dei pårørande, sa Luoto like etter drapet.

Finsk politi har opplyst at dei meiner drapet var planlagt i minst ei veke.

Første opne homofile spelaren i Finland

I avhøyr av den utflytta trønderen har det ikkje kome fram opplysingar om at 60-åringen har vore valdeleg mot Puhakka tidlegare.

I 2019 blei Puhakka den første mannlege ishockeyspelaren som stod fram som homofil.

– Han er ein av dei modigaste spelarane i Finland.

Det sa Ilmari Pitkänen som spelte ishockey saman med Puhakka for eliteserielaget Espoo Blues i 2016.

29-åringen deltok for tida i den finske utgåva av «Forræder», som er kalla «Petolliset» i Finland.

Puhakka kom til finalen i programmet og episoden skal ha blitt sendt søndag 10. november etter ynskje frå familien hans.